Ukraina İç işler nazirligi bildirgenine köre, bugünge qadar Kyiv vilâyetinde «Rusiye arbiyleri tarafından qurşunğa tizilgen ve çekiştirilip öldürilgen» 1300 insannıñ cesedi çıqarıldı.
«Rusiyeliler tarafından qurşunğa tizilgen ve çekiştirilip öldürilgen ukrainalılarnıñ cesedleri alâ daa Kyiv vilâyetinde qala. Bugünge qadar 1300-den çoq barışıqsever sakinniñ cesedi eksgumatsiya etildi. Mezarlar yerinde tahqiqat tedbirleri keçirilgen soñ olarnı mahkeme-tibbiy ekspertizalar keçirilgen morgğa yolladılar», – dep aytıla İç işler nazirliginiñ Facebook haberinde.
Müessise, 200-den çoq öldürilgenniñ kim olğanını añlap olamadılar, dep qayd etti.
Aprelniñ 2-nde Kıyiv vilâyeti Rusiye ordusından azat etildi. RF ordusı keri çekilgen soñ azat etilgen şeer ve köylerde silâsız adamlarnıñ kütleviy ölümi alları qayd etildi. İlk nevbette söz Buça aqqında kete.
Ukrayina ve bazı Ğarp memleketleri Rusiyeni Kıyiv vilâyetindeki arbiy cinayetleri içün mesüliyetke çekmege talap eteler.
Rusiye işğal vaqtında yüz bergen öldürüvler faktı satellit resimleri ile tadıqlanğanına baqmadan, Kreml «silâsız adamlarnıñ öldürüvi ile bağlı er angi qabaatlavlarnı red ete».
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
