ABD Devlet kâtibi Antony Blinken Rusiyeniñ Ukrainağa qarşı cenkte ğalip çıqacaq dep, Rusiye Federatsiyasınıñ prezidenti Vladimir Putinni istilânı tez toqtatmasına çağırdı. Bu aqta Blinkenniñ iyünniñ 3-nde, Rusiyeniñ Ukrainağa qarşı istilâ başlağanından yüz kün keçkende, yapqan beyanatında aytıla.
«Biz prezident Putinni bu zıddiyetni ve cenkten sebep çıqqan büyük zorluq ve zararlarnı tez toqtatmasına çağıramız», – dep qayd etti Blinken.
Onıñ aytqanına köre, fevralniñ 24-nden Amerika Birleşken Devletleri Ukrainağa 6,3 milliard dollar telükesizlik, gumanitar ve iqtisadiyat yardımını kösterdi.
«ABD prezidenti Joseph Biden aytqanı kibi, bizim maqsadımız: ABD ilerideki istilâdan qoruycaq ve yol bermeycek vastalarnen demokratik, mustaqil, suveren ve inkişaf etken Ukrainanı körmege isteyler», – dep bildirdi devlet kâtibi.
«Yaqınlarını coyğan, zorbalıqtan zarar körgen, köy, daire, mektep, hastahaneleri bomba, snarâd ve raketalardan zarar körgen, Rusiyeniñ «filtratsion» lagerlerine yollanğan ve andan qaytqan ukrainalı qorantalarğa: ABD – yanıñızda; suverenitet ve topraq bütünligiñizni qorumağa yardım etecekmiz, bu cenk bitkende er şeyni yañıdan qurmağa yardım etecekmiz. Ukraina ğalebe qazanacaq», – dep qayd etti Blinken.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
