Rusiye uquq qoruyıcılarınıñ Herson vilâyetiniñ işğal altındaki qısmında apiske alğan qırımtatarlarnıñ sayısı Rusiye Noman Çelebicihan «qırımtatar batalyonını» «terror teşkilâtı» olaraq tanığan soñ arta bile. Böyle fikirni «KrımSOS» aq qorçalayıcı teşkilâtınıñ talilcisi Yevğen Yaroşenko seslendirdi.
«Fevralniñ 24-nden soñ 6 qırımtatarı Noman Çelebicihan batalyonınen alâqaları bar manaçığınen apiske alındı. Bazıları Herson vilâyetinde hırsızlandı ve Qırımğa zorbalıqnen çıqarıldı. Noman Çelebicihan batalyonında iştirak etüv manaçığınen Herson vilâyetinde tutulğan ve Aqmescit SİZOsına qapatılğan qırımtatarlarnıñ sayısı arta bile», – dep tüşüne Yaroşenko.
Hatırlatamız, Rusiye Yuqarı mahkemesi «Noman Çelebicihan qırımtatar göñülli batalyonını» «terror teşkilâtı» olaraq tanıp, Rusiye Federatsiyasında yasaqladı.
Bundan evel işğal altındaki Qırımda qırımtatarlarğa qarşı bir qaç qabaatlayıcı qarar çıqarıldı. Olarnı qurucısı ATR telekanalınıñ baş müdiri Lenur İslâmov olğan «qırımtatar batalyonınıñ» azaları olğanında qabaatlı tanıdılar. İslâmov ise ğıyabiy şekilde 18 yıl apis cezasına ve 1 mlrd ruble para cezasına üküm etildi. Onı Qırımnıñ «blekautını teşkil etkeninde» qabaatlaylar. İslâmovnıñ Qırım.Aqiqatqa bildirgenine köre, o, mezkür qararnı Avropa insan aqları mahkemesinde şikâyet etecek.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
