Rusiye telegram-kanalları Aqmescitte arbiy komissarlıqnı ateşke bergeninden şübheli sayılğan erkek tutuldı, dep bildire.
SHOT kanalınıñ malümatına köre, Colman köyüniñ 39 yaşında işsiz sakini İgor Kupiç tutuldı.
«Mash na volne» telegram kanalı iyünniñ 1-nde Rusiye uquq qoruyıcıları tutulğannıñ evine keldi, dep bildirdi. Bundan soñ onı vaqtınca tutuv izolâtorına alıp ketkenler.
Rusiye uquq qoruyıcıları bu malümatnı resmiy şekilde aydınlatmadı. Açıq izaat da yoq.
Mayısnıñ 28-ne keçer gecesi Aqmescitniñ Selvinskiy soqağında kimligi belli olmağan insan arbiy komissarlıqnı ateşke bermege tırıştı.
Rusiyeniñ Ukrainağa qarşı cenk başlatqanından Rusiye Federatsiyasında 10-dag çoq arbiy komissarlıqnı yaqmağa tırışqanlar. Bunı yapqanlarnıñ çoqusı belli degil.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
