Ukrainalılar memlekette til meselesi uydurılğanından daa çoq emin: keçken yılğa köre, Merkeziy ve Ğarbiy Ukraina sakinleriniñ sayısı 27%-dan 44%-ğa qadar arttı. Bu, İlko Kuçeriv Demokratik teşebbüsler fondu keçirgen içtimaiy sorav neticelerinde bar.
Şimdi soravğa qoşulğan Merkeziy ve Ğarbiy Ukraina sakinleriniñ tek 7 fayızı til meselesini memleketniñ eñ pıtraqlı meselelerinden biri olaraq saya.
«Böyle neticeler Rusiye propagandası qabartqan Ukraina cemiyeti içindeki til zıddiyetleri aslında suniy olğanını isbatlay», – dep qayd ete sotsiologlar.
Bundan ğayrı, Merkeziy ve Ğarbiy Ukraina sakinleriniñ 75%-ı mektep ve aliy oquv yurtlarında tasil tek devlet tilinde berilmeli, dep tüşüne. Daa 15% milliy azlıqlarnıñ tilleri başlanğıç mektepte ögretilmeli, soñra ise tek ukraince olmalı, dep tüşüne.
Tedqiqat 2022 senesi mayısnıñ 7-nden 15-ne qadar Ukrainanıñ yedi ğarbiy (Volın, Zakarpattâ, İvano-Frankivsk, Lviv, Rivne, Ternopil, Çernovtsi) ve dört merkeziy (Vinnıtsâ, Kirovoğrad, Hmelnıtsk, Çerkası) vilâyetlerinde face-to-face usulınen kerçekleştirildi.
Soravda 1000 insan iştirak etti. Eñ büyük tesadufiy nuqsan 2,2%-dan çoq degil, dep qayd ete sotsiologlar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
