Türkiye Rusiyege qargı sanktsiyalar meselesinde bitaraf qala, dep bildirdi Tış işler naziri Mevlüt Çavuşoğlu Anadolu agentligine, dep haber ete mayısnıñ 31-nde agentlikniñ rus tilli versiyası.
Diplomatnıñ aytqanına köre, Türkiye sanktsiyalarğa qoşulmasa da, olarnıñ aqibetlerini is ete. O, Ankara tek BM seviyesinde kirsetilgen sıñırlavlarğa qoltutacaq, dep bildirdi.
«Bugün Türkiye regionda vaziyetniñ kerginligini eksiltmek içün ğayret köstere. Bütün taraflar Ankaranıñ adımlarına qoltuta. Türkiye sanktsiyalarğa qoltutsa, memleketimizniñ rolü sual işareti altında olacaq. Qayd etmeli ki, Türkiye teşebbüsleriniñ müsbet neticelerini bütün taraflar qabul ete. Ankaranıñ Rusiyege qarşı sanktsiyalarına qoşulmağanında fayda körgen hususan Avropa memleketleri az degildir», – dedi nazir.
Tış işler naziri Türkiyeniñ halqara mecburiyetlerini de qayd etti. Ava boşluğını o sebepten qapatmay.
«Aytqanlarımnıñ hulâsasını çıqarıp, biz sanktsiyalarğa qoltutmadıq, dep aytmağa ister edim. Amma bu Ankara Türkiye vastasınen sıñırlavlardan qurtulmağa izin berecek manasını taşımay. Biz böyle bir şeyge izin bermeycekmiz. Türkiyeniñ fikri belli ve tamdır», – dep ayttı Çavuşoğlu.
Avropa Birliginiñ liderleri mayısnıñ 31-nde Rusiye cermayınıñ Avropa Birligine italini üçte ekisinden ziyadesine qısqartacaq sanktsiyalarnı tasdıqladı.
Ukraina prezidenti Volodımır Zelenskıy «Avropa er türlü Rusiye cermayından ve cermay mallarından vazgeçmege mecbur olacaq, çünki bu avropalılarnıñ rusiye Federatsiyasınıñ energetik silâsına muhtac olğanı aqqındadır», dep ayttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
