Soñki künde Rusiye Federatsiyasınıñ ordusı Ukrainada 150 arbiyini coydı, Ukrainağa qarşı cenk başlağanından ise 30 500 Rusiye askeri öldi. Bu aqta Ukraina Silâlı quvetleriniñ Baş ştabı bildire.
Soñki künde Rusiye Federatsiyası eñ çoq Krıvıy Riğ ve Zaporijjâ yönelişlerinde zarar kördi.
Ukraina Baş ştabınıñ malümatına köre, mayısnıñ 31-i sabasına qadar Rusiyeniñ ğayıp etkenleri:
• 1358 tank,
• 3302 zırhlı araba,
• 649 top sisteması,
• 207 çoqlu ateş raketa sisteması,
• 93 ava mudafaa vastası,
• 208 uçaq,
• 174 vertolöt,
• 515 operativ-taktik seviyeli uçucısız cihaz,
• 120 qanatlı raketa,
• 13 gemi/kater,
• 2275 maşina tehnikası ve avtotsisterna,
• 48 dane mahsus tehnika.
Ukraina Silâlı quvetleriniñ Baş ştabı Rusiyeniñ zararları aqqında malümat teşkerile, dep qoştı.
Moskva soñki vaqıtları Ukrainada körgen zarar ve ölgen askerleriniñ sayısı aqqında malümat bermey.
Martnıñ soñunda ABD baş kâtibiniñ muavini Viktoriya Nuland Rusiyeniñ Ukrainağa qarşı cenkinde 10 biñden çoq Rusiye arbiyi öldi, dep bildirdi. Aprelniñ 15-nde Bellingcat jurnalist tedqiqatları leyhasınıñ müdiri Hristo Grozev Rusiye o vaqıt eñ az 16 biñ arbiyini ğayıp etti, dep bildirdi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
