Qırımda Rusiye kontrolindeki Aqmescitniñ Merkeziy rayon mahkemesi qırımlı advokat Ayder Azamatovğa sekiz kün idariy apis cezasını bermege qarar aldı, dep haber ete «Qırım birdemligi» cemaat birleşmesi.
Mahkemeniñ fikirince, advokat 2021 senesi oktâbrniñ 25-nde «Merkeziy» iç işler rayon bölüginiñ binası ögünde zenaatdaşı Edem Semedlâyevni imaye etip, Rusiye Memuriy uquq bozuvları kodeksiniñ 20.2.2 maddesiniñ 1-inci qısmına idariy uquqnı bozdı.
Azamatov Aqmescitniñ vaqtınca tutuv izolâtorına alındı. Mahkeme qararınen bağlı izaatları şimdilik yoq.
Aqmescitniñ Merkeziy rayon mahkemesinde daa bir advokat Emine Avamilevanıñ davası baqıla. Mahkeme qararı daa seslendirilmedi.
Hatırlatamız, advokatlar Ayder Azamatov ve Emine Avamileva mayısnıñ 27-nde Aqmescitniñ Merkeziy rayon mahkemesiniñ binası ögünde zenaatdaşları Nazim Şeyhmambetovnı qorumağa kelgende tutuldı.
Olar tutulğan soñ mahkeme Nazim Şeyhmambetovğa sekiz kün idariy apis cezasını berdi.
ABD OSCE missiyası Qırımda mustaqil advokatlarnı taqip etüv siyasetini toqtatmağa çağırğan edi. Semedlâyevniñ apiske alınmasını Büyük Britaniyanıñ Ukraina elçihanesi ve Çeh Cumhuriyeti elçihanesi takbih ettiler. Ukraina Tış işler nazirligi Edem Semedlâyevniñ apiske alınğanını «iş aqlarınıñ bozuluvı» ve «basqı» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
