Rusiye ordusı keçken künü 250 askerini coydı, mayısnıñ 27-nde eñ çoq Rusiye ordusı Avdiyıvka ve Krıvıy Riğ yönelişlerinde zarar kördi, dep bildirdi Ukraina Silâlı quvetleriniñ Baş ştabı.
Umumen, Ukraina Silâlı quvetleriniñ Baş ştabı malümatına köre, Rusiyenıñ Ukrainağa kerçekleştirgen büyük ücümi başlağanından mayısnıñ 28-ne qadar coyğanları:
- tahminen 30 000 arbiy,
- 1330 (künde +8) tank,
- 3258 (+12) zırhlı araba,
- 628 (+5) top sisteması,
- 203 (+2) çoqlu ateş raketa sisteması,
- 93 ava mudafaa vastası,
- 207 (+1) uçaq,
- 174 (+4) vertolöt,
- 503 operativ-taktik seviyeli uçucısız cihaz,
- 116 (+1) qanatlı raketa,
- 13 gemi/kater,
- 2226 maşina tehnikası ve avtotsisterna,
- 48 dane mahsus tehnika.
Ukraina Silâlı quvetleri, malümat teşkerile, dep qayd etti.
Moskva Ukraina ile cenkte körgen zararları aqqında soñki vaqıtları bildirmey. Martnıñ 25-nde cenk başlağanından ekinci sefer Rusiye tarafı ölgen ve yaralanğan Rusiye arbiyleri aqqında bildirdi. O malümatqa köre, 1351 Rusiye arbiyi elâk oldı, daa 3 825 asker yaralandı.
Aprelniñ 7-nde Rusiye prezidenti Vladimir Putinniñ spikeri Dmitriy Peskov Sky News içün intervyüsında Rusiye ordusı Ukrainada «büyük zarar» kördi, dep ayttı.
«Mediazona» neşiri ve BBC rus hızmeti göñüllilernen beraber mayısnıñ 20-ne qadar Ukrainağa qarşı cenkte ölgen Rusiye arbiyleri aqqında açıq haberlerni talil etip, eñ az 2622 arbiy aqqında malümat berildi, dep haber etkenler. Menba olaraq soy-soplar, akimiyet ve kütleviy haber vastaları alındı.
Taraflarnıñ malümatını mustaqil menbalarda teşkermek imkânsızdır.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
