Avropa Birligi, ABD ve Büyük Britaniya Ukrainadaki cenk cinayetlerini tahqiq etecek mesleat gruppası (Atrocity Crimes Advisory Group, ACA) quruldı, dep ilân etti.
Komissiya Ukraina Baş prokurorınıñ ofisi keçirgen Ukrainada Rusiye ordusınıñ arbiylerini mesüliyetke çekmek içün olar tarafından yapılğan cinayetlerni qayd etüv, saqlav ve talil etüv işine yardım etecek.
«Rusiye ordusınıñ Ukrainada yapqan cinayetler şaatlıqları toplanmağa devam ete», – dep aytıla ABD baş kâtibi Entoni Blinkenniñ beyanatında.
AB diplomatiyasınıñ yolbaşçısı Jozep Borrel «Ukrainağa qarşı kerçekleştirilgen sebepsiz Rusiye tecavuzı vaqtında qorqunç cinayetlerde qabaatlı olğan» er kesni mesüliyetke çekmek müim ola, dep qayd etti.
Mesleat gruppasınıñ çoqusı kriminal eksperti telükesizlik maqsadınen Poloniyada bulunacaq.
2022 senesi mayısnıñ 23-nde Kyivniñ Solomenskıy mahkemesi Sumı vilâyetinde barışıqsever insannı öldürgeninde qabaatlanğan Rusiye serjantı Vadim Şişimarinni ömür boyu apis cezasına üküm etti. Şişimarin cenk başlağanından Ukraina mahkemesine çıqarılğan ilk Rusiye arbiyi oldı.
Poltava vilâyetiniñ mahkemesi daa eki Rusiye arbiyi – Aleksandr Bobıkin ve Aleksandr İvanovnıñ davasını baqa. Tahqiqat malümatına köre, fevralniñ 24-nde olar Harkiv vilâyetine açılğan ateşte iştirak etti.
Rusiye fevralniñ 24-nde Ukrainağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrainadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrainanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrainanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
