Rusiye arbiyleri işğal etken Herson vilâyetinde Azovske köyüniñ sakini Ruslan Abdurahmanovnı tutıp, Rusiye işğal etken Qırımğa alıp ketti. Bu aqta Ukraina prezidentiniñ Qırım Muhtar Cumhuriyetindeki temsilciligi haber ete.
«Mayısnıñ 20-nde Geniçesk rayonınıñ Azovske köyünde kene filtratsion tedbirler keçirdi, yerli sakinlerninh evlerinde tintüv keçirdi ve baqıp çıqtı. İşğalcilerniñ qanunsız areketleri neticesinde işğal etilgen Qırımğa Ruslan Abdurahmanov çıqarıldı. İlk malümatqa köre, onı «Asker» cemaat birleşmesinde iştirak etkeninde qabaatlaylar. Al-azırda Ruslan Abdurahmanov işğal altındaki Aqmescit SİZOsında tutuladır», – dep aytıla haberde.
Ukraina prezidentiniñ temsilciligi «Asker» cemaat birleşmesiniñ reberi Lenur İslâmovnıñ malümatına esaslanıp bildirgenine köre, Abdurahmanov teşkilât azası degil ve «Qırımnıñ vatandaş qamaçavında» iştirak etmedi.
«İşğalciler yerli ealini qorquzmaq, Rusiye Federatsiyasınıñ ordusı tarafından Ukraina topraqlarınıñ zapt etilüvine kösterilgen er angi vatandaş tirenüvini bastırmaq içün insannı açıq-açıq hırsızladılar», – dep bildirdi Ukraina prezidentiniñ QMC temsilciligi.
Aprel ayında Rusiye ordusı işğal etken Herson vilâyetiniñ Novooleksiyıvka köyünde Kremlniñ sabıq siyasiy mabüsi Edem Bekirovnıñ evinde tintüv keçirildi.
Rusiye Ukrainağa büyük ücüm etken soñ aq qorçalayıcılar ve mustaqil jurnalistler işğalci akimiyetke qarşı çıqqan ya da olarnen işbirligi yapmağa istemegen Herson vilâyetiniñ sakinleri hırsızlanğanını qayd ete. Herson vilâyetindeki Rusiye işğalci akimiyeti insan hırsızlavlarını ve region sakinleriniñ işkencelerini izaatlamay.
Rusiye fevralniñ 24-nde Ukrainağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrainadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrainanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrainanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
