Ankarada mayısnıñ 25-nde Finlândiya ve İsveçiya vekilleriniñ Türkiye resmiy şahıslarınen körüşüvi ötkerilecek. Tedbirde eki şimaliy memleketniñ NATO azalığı muzakere etilecek. Bu aqta Finlândiya Tış işler naziri Pekka Haavisto bildirdi.
«Biz eyyetlerimizni Ankaranı ziyaret etmege yollaymız. Yarın olacaq, şunıñ içün dialog devam ete», – dep ayttı Haavisto Davostaki Dünya iqtisadiyat forumındaki munaqaşada.
«Türkiyeniñ telükesizlik problemleri bar olğanını añlaymız… Bu meseleler çezile bile, dep tüşünemiz. Bundan ğayrı, doğrudan Finlândiya ve İsveçiyanen bağlı olmağan, daa çoq diger NATO azalarınen bağlı bazı meseleler ola bile», – dep qoştı o.
NATO yolbaşçısı Jens Stoltenberg mayısnıñ 24-nde NATO İsveçiya ve Finlândiyanı aza olaraq qabul etip olacaq, dep eminliknen ayttı.
Davostaki Dünya iqtisadiyat forumında o, Rusiyeniñ Ukrainağa sebepsiz arbiy istilâsınıñ menfiy aqbiyetleri bar, Putin bunıñ tam tersi olacaq, dep tüşüngen edi, dep ayttı.
«Öz sıñırlarında daa az NATO istedi ve cenk başlattı. Şimdi öz sıñırlarında daa çoq NATO körecek», – dedi Jens Stoltenberg.
Türkiye prezidenti Recep Tayyip Erdoğan İsveçiya ve Finlândiyanıñ İttifaqqa qoşuluvına qarşı çıqıp, mayısnıñ 21-nde eki memleketniñ liderlerinen telefonda laf etti ve qasevetlengenini bildirdi.
Türkiye prezidenti İsveçiya ve Finlândiya Türkiyeniñ milliy telükesizligi içün havflı olğan «terror» gruppalarğa maddiy ve siyasiy yardım köstermekten vazgeçmeli, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
