Ukraina silâlı quvetleri 2022 senesiniñ soñuna qadar işğal etilgen Qırımğa kirmeli. Bu aqta Ukraina Mudafaa nazirligi Baş istihbarat idaresiniñ yolbaşçısı Kırılo Budanov «Ukrayınska pravda» neşirine bergen intervyüsında ayttı.
«Yılnıñ soñuna qadar Qırımğa kirmelimiz», – dedi Budanov.
Budanovnıñ aytqanına köre, Rusiye Federatsiyasınıñ Ukrainağa qarşı cenki «Rusiye topraq bütünliginiñ resmiy saqlanması ya da «Rusiyeniñ üç ve daa çoq bölükke bölünmesi» vaziyetinde (Rusiye – QA) siyasiy reberliginiñ deñişmesinen» bitmeli.
Rusiye akimiyeti Ukraina istihbaratı yolbaşçısınıñ aytqanlarını açıq şekilde izaatlamadı.
Bundan evel Budanov Ukraina işğal altındaki topraqlarını yalıñız küç qullanıp azat etecek, dep bildirdi.
Budanovnıñ fikirince, Rusiyeniñ Ukrainağa qarşı cenkinde müim vaqıt avgust ayında olacaq ve bu yılnıñ soñuna qadar yekünlenecek.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
