Ukraina prezidenti Volodımır Zelenskıy onıñ Rusiye prezidenti Vladimir Putin ile körüşüvi yalıñız cenk toqtatıluvı muzakere etilse, keçirile bile, dep bildirdi. Zelenskıy bu aqta mayısnıñ 23-nde, Davostaki (İsviçre) Ukrain evinde çıqışta bulunıp ayttı.
Zelenskıynıñ bildirgenine köre, Rusiyede «qararlar böyle alına – o (Putin – QA) olmasa, qararlar alınmay».
«Onsız cenk toqtatuv qararı alınmaycaq. Şunıñ içün Rusiye Federatsiyasınıñ prezidenti ile körüşüvsiz olmaz. Yapqanlarından soñ bu körüşüvlernen bağlı büyük istekler olmaycaq. Aracılarnen körüşmek istekleri yoq ve olmaycaq. Şunıñ içün Rusiye Federatsiyasında prezidentten ğayrı, er angi birinen körüşüv yapılmasını istemeyim, masada bir mesele olmalı – cenk toqtatıluvı. O qadar. Başqa laf etilecek bir şey yoq», – dep bildirdi Zelenskıy.
Bu ay Ukraina prezidenti Volodımır Zelenskıy Putin ile körüşüvge azır, amma ültimatum ve aracılar olmaycaq, dep bildirdi.
Onıñ aytqanına köre, Rusiye fevralniñ 24-nden evelki yerlerine qaytmalı. «Bu bir şeyni muzakere etmek içün ilk adım olur. Bu sualniñ cevabını eşitmeymiz», – dedi prezident.
Mayısnıñ 17-nde Prezident ofisi yolbaşçısınıñ buhran ile küreş mesleatçısı ve Rusiye ile muzakerelerde Ukraina eyyetiniñ azası Mıhaylo Podolâk Rusiyeniñ «Ukrainanıñ muzakere esnasından çıqışı» aqqında beyanatını izaatlap, Azatlıq Radiosınıñ yayınında Ukraina ve Rusiye arasında siyasiy muzakereler «teneffüste» ve «tam bir şey olğanda» devam etecek, dep ayttı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
