«Azov» polkunıñ komandan muavini Svâtoslav Palamar (tahallüsi «Kalina») polknıñ komandanlığı Mariupoldeki «Azovstal» zavodında qalmağa devam ete, dep bildirdi. Bu aqta o, Azatlıq Radiosınıñ mühbirine berilgen videoda ayta.
O, muracaatnı cenkniñ 85-inci künü, yani mayısnıñ 19-nda, çıqara, dep ayttı.
«Men ve komandanlıq «Azovstal» zavodında bulunamız. Tafsilâtlarını aytmaycam, belli bir operatsiya keçirile. Bütün dünya ve Ukraina yardım içün sağ olsunlar. Körüşirmiz», – dep ayttı Palamar.
Ukraina prezidenti Volodımır Zelenskıy mayısnıñ 18-nde Mariupoldeki «Azovstal» zavodından tahliye tedbirleri devam ete, dep qayd etti.
Ukraina Mudafaa naziriniñ muavini Ğanna Malâr mayısnıñ 17-nde gece Ukraina arbiyleri «Azovstal» zavodından tahliye etip başlağanını tasdıqladı. Onıñ aytqanına köre, ağır yaralanğan 53 arbiy işğal etilgen Novoazovsk tibbiy müessiselerine tahliye etildi. Daa 211 insan gumanitar ayattan Yelenovkağa ketirildi.
Mayısnıñ 16-nda aqşam «Azov» polkunıñ komandanı Denis Prokopenko Mariupol imayecilerini ayatlarını qorumaq içün emirni yerine ketirdi, dep bildirdi. Angi emir aqqında aytılğanını añlatmadı. Tek Mariupol garnizonınıñ arbiyleri 82 kün devamında «duşmannıñ büyük küçlerini özüne çekti», dep ayttı. Ve «yüksek arbiy komandanlıqnıñ» «tasdıqlanğan qararını» yerine ketireler, dep qayd etti.
Prezident Volodımır Zelenskıy Ukraina Mariupolniñ blokunı cenk yolunen toqtatamay, dep aytqan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
