Rostov-na-Donu Cenübiy okrugınıñ arbiy mahkemesinde qabaatlav tarafı qırımlı faal, «qırımlı musulmanlar davasınıñ» mabüsi İsmet İbragimov içün 500 biñ ruble para cezası berilmesini istedi, dep haber ete «Qırım birdemligi» cemaat birleşmesi.
«İbragimovnıñ qabaatlavı bütünley isbatlandı. Cinayet bağlı olmağan sebeplerden soñunace yapılmadı. İbragimov Hizb ut-Tahrir İslâm qurtarıluv firqasınıñ Rusiye Federatsiyasında yasaqlanğanını bile edi, amma onı teşkil etti ve faaliyetine gizliden yardım etti. Mahkemeden İbragimovnıñ şaatlığına mümkün olğanı qadar tenqitnen yanaşmağa rica etem. Mahkümniñ aqlı yerinde ve yapqanları içün mesüliyet taşımalı», – dep bildire Rusiye prokurorı Sergey Aydinovnıñ aytqanlarını «Qırım birdemligi».
Mahkümniñ advokatı Ayder Azamatov mahkemege gizli şaatlarnıñ malümatı bir-birine ters kele, dep bir qaç kere qayd etti. Olar tahqiqatçınıñ odasında mahkeme tahqiqatı başlamazdan evel qayd etilgenlerinden pek farqlı edi.
İsmet İbragimov ve advokatı Ayder Azamatov iyünniñ 2-nde munaqaşalarda sözge çıqacaqlar. Aynı künü qabaatlanğan kişi soñki sözüni aytacaq. Soñra mahkeme üküm çıqarmaq içün mesleat odasına ketecek.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
