Qırımda mayısnıñ 19-nda aqşam ava bozulacağı içün furtuna havfı ilân etildi. Bu aqta Qırımdaki Rusiye Fevqulâde vaziyetler nazirliginiñ idaresi bildire.
«Yaqın 1-2 saatta ve mayısnıñ 19-nda aqşamğa qadar Qırımda kütçü yağmur, boranlı yağmur ve burçaq yağacaq», – dep aytıla haberde.
Qurtarıcılar fevqulâde vaziyet peyda ola ve yerlerni suv basa bile, dep tenbiley.
«Reklama levhaları, terek, yahşı pekitilmegen inşaatlar tüşe ve elektrik hatları üzüle bilecegi içün ealiniñ ayatı ve sağlığına zarar ketirile bile», – dep qoştı qurtarıcılar.
Qırım Gidromettsentri yarımadada yağmurlar yağacaq, ava arareti eksilecek, dep tenbiledi: gece 3-8°, kündüz 12-17°. İş aftasınıñ soñuna qadar salqın olacaq, bazı vaqıtları yağmur sepeleycek.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
