Aqyar merkezinde mayısnıñ 19-nda pioneriyanıñ 100 yılı munasebetinen arbiy urbada balalarnıñ yürüşi keçirildi, dep haber ete Qırım.Aqiqat mühbiri.
Mektep talebeleri Nahimov caddesinden keçti. Balalarnıñ qollarında «Zafer mirasçılarınıñ yürüşi» yazuvlı şiar, Georgiy şeriti ve beşköşe yıldız bar edi. Başta arbiy-deñiz urbada mektep talebeleri, «yunarmiya» vekilleri, arbiy sanat mektebiniñ talebeleri, qırmızı başlıqlı ve boyunbağlı balalar keçti. Qollarında «Aqyar arbiy-vatanperever genç terbiyesi merkezi», «Zarnitsa» arbiy-sport oyunı», «Post №1» transparantlarını taşıdı. Soñra şeerde genç tedqiqatçılar, sportçı, oyuncı, medeniy cemiyet faalleri keçti.
Yürüş vaqtında Aqyar merkezinde areket toqtatıldı. Primorskiy bulvarınıñ kirişini polis qaravulladı, şeyler baqıldı. Nahimov caddesi Rusiye polisi ve Rusiye qazaq teşkilâtları tarafından sarıp alındı. Şeer radiosı vastasınen soqaqlarda sovet mültfilmleriniñ hitleri yanğıradı.
Mayısnıñ 19-nda Birlik pioner teşkilâtı qurulğanınıñ 100 yılı oldı.
Rusiye akimiyeti Qırım mekteplerinde kadet sınıflarını aça ve talebelerni «Yunarmiya» arbiy-vatanperver areketine qabul ete. Balalar silâ bozıp toplamağa, ateş açmağa, kamuflâj taqmağa ve sıranen yürmege ögrene.
Ukraina aq qorçalayıcıları işğal etilgen Qırımda balalarğa berilgen terbiye arbiy formatta yapıla, dep qayd etken edi. Psihologlar Rusiyeniñ zemaneviy tasilinde balalarnıñ añlavına basqı yapıla, dep qayd ete.
Qırım Muhtar Cumhuriyetiniñ prokuraturası Qırımda «balalar arasında yapılğan cenk propagandası» sebebinden tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
