Qızıl Haç Halqara komiteti Mariupol şeerindeki «Azovstal» zavodını terk etken yüzlernen arbiyni qayd etip başladı, dep bildirdi.
«Soñki 2 künde Mariupoldeki «Azovstal» zavodını terk etken yüzlernen arbiyni qayd ettik. Cenk esirleriniñ qayd etilüvi işimizniñ müim parçası ola. Olarğa insaniy ve lâyıq bir şekilde yanaşılması pek müim», – dep haber ete Qızıl Haç Halqara komiteti mayısnıñ 19-nda Twitterde.
Qızıl Haç Halqara komitetiniñ beyanatında aytılğanına köre, qayd etüv esnasınıñ devamı ad, doğğan künü ve yaqın soylar aqqında şahsiy malümatnı aluv demektir.
«Bu Qızıl Haç Halqara komitetine esir alınğanlarnı taqip etmege ve olarğa qorantalarınen bağlanmağa yardım etmege imkân bere», – dep aytıla.
Jeneva şartnamelerine köre, Qızıl Haç Halqara komitetiniñ cenk esirlerini «şaatsız» soraştırmaq aqqı bar ve olarnen körüşüvler «qanunsız sıñırlanmamalı».
Ukraina Mudafaa naziriniñ muavini Ğanna Malâr mayısnıñ 17-nde gece Ukraina arbiyleri «Azovstal» zavodından tahliye etip başlağanını tasdıqladı.
Rusiye Mudafaa nazirliginiñ bildirgenine köre, 959 Ukraina arbiyi Mariupoldeki «Azovstal» zavodından çıqarıldı, 80-si – yaralanğanlar. Ukraina arbiyleri Rusiye işğal etken yerge çıqarıldı.
Mariupolden çıqarılğan Ukraina arbiyleriniñ taqdiri belli degil. Ukraina Mudafaa nazirligi «Azovstaldeki» arbiylerni deñişüv vastasınen evge qaytarmağa planlaştıra, dep bildirdi.
Lâkin Devlet Dumasında «Azov» askerlerini Ukrainağa bermemege çağıralar, mayısnıñ 18-nde deputatlar «natsist cinayetçileriniñ deñişüvini» yasaqlağan qarar leyhasını baqacaq. Mayısnıñ 17-nde belli olğanına köre, Rusiye Baş prokuraturası Yuqarı mahkemege muracaat etip, «Azov» Ukraina polkunı terror teşkilâtı olaraq tanımağa ve memlekette faaliyetini yasaqlamağa çağırdı.
Rusiye Tahqiqat komiteti «DNRden» çıqqan Ukraina arbiylerini sorğuğa çekmek planları aqqında haber etti.
«Azov» polku ve diger Ukraina bölükleriniñ askerleri liman şeeri olğan Mariupolni imaye etti. Şeer mart başından berli qamaçavda edi, askerler «Azovstal» maden kombinatında blok etildi. «Azov» birleşmesi 2014 senesi göñülli batalyonı olaraq quruldı. Temelinde sağcı faaller bar edi. Lâkin «Azovnıñ» bir çoq askeri neonatsist olmağanını, polknıñ özü ise Ukraina Silâlı quvetleriniñ esas qısmı oldı, dep qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
