Rusiye Mudafaa nazirliginiñ bildirgenine köre, 959 Ukraina arbiyi Mariupoldeki «Azovstal» zavodından çıqarıldı, 80-si – yaralanğanlar. Ukraina arbiyleri Rusiye işğal etken yerge çıqarıldı. Rusiye müessisesiniñ bildirgenine köre, olar «teslim oldı».
Ukraina akimiyeti Rusiye Mudafaa nazirliginiñ soñki beyanatını şimdilik izaatlamadı. Faqat arbiyler komandanlıqnıñ avalesinen «Azovstalni» terk ete, dep tasdıqladı. Zavodda qalğan Ukraina arbiyleriniñ sayısı şimdilik belli degil.
Ukraina arbiyleri Mariupolde qalğan soñki obyektleri olğan «Azovstalni» mayısnıñ 16-nda terk etip başladı. Bir kün evelsi eñ az yedi Ukraina arbiyleri avtobusı zavoddan Rusiyege qoltutqan silâlı quvetlerniñ nezareti altında çıqtı. Reuters agentliginiñ malümatına köre, olarnı Donetsk civarındaki Yelenovka köyüniñ koloniyasına ketirildi.
Mariupolden çıqarılğan Ukraina arbiyleriniñ taqdiri belli degil. Ukraina Mudafaa nazirligi «Azovstaldeki» arbiylerni deñişüv vastasınen evge qaytarmağa planlaştıra, dep bildirdi.
Lâkin Devlet Dumasında «Azov» askerlerini Ukrainağa bermemege çağıralar, mayısnıñ 18-nde deputatlar «natsist cinayetçileriniñ deñişüvini» yasaqlağan qarar leyhasını baqacaq. Mayısnıñ 17-nde belli olğanına köre, Rusiye Baş prokuraturası Yuqarı mahkemege muracaat etip, «Azov» Ukraina polkunı terror teşkilâtı olaraq tanımağa ve memlekette faaliyetini yasaqlamağa çağırdı.
Rusiye Tahqiqat komiteti «DNRden» çıqqan Ukraina arbiylerini sorğuğa çekmek planları aqqında haber etti.
«Azov» polku ve diger Ukraina bölükleriniñ askerleri liman şeeri olğan Mariupolni imaye etti. Şeer mart başından berli qamaçavda edi, askerler «Azovstal» maden kombinatında blok etildi. «Azov» birleşmesi 2014 senesi göñülli batalyonı olaraq quruldı. Temelinde sağcı faaller bar edi. Lâkin «Azovnıñ» bir çoq askeri neonatsist olmağanını, polknıñ özü ise Ukraina Silâlı quvetleriniñ esas qısmı oldı, dep qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
