Mayısnıñ 18-nde Qırımda 123 insan siyasiy esaslı cinaiy taqip altında buluna, 98-i – qırımtatarıdır. Bu aqta KrımSOS aq qorçalayıcı teşkilâtınıñ analitigi Yevğen Yaroşenko bildirdi.
«Şimdi 98 qırımtatarı siyasiy sebeplerden nezaret altında buluna. 84 insan «Hizb ut-Tahrir davaları» boyunca, 10-u – «Noman Çelebicihan batalyonı davası» boyunca, 3-ü – «gaz borusındaki diversiya davası» boyunca taqip etile, 1-i – faal Yunus Maşaripovnıñ davası. 98 qırımtatarından 64-ü umumen 892 yıllıq ükümler aldı», – dep tarif etti Yaroşenko.
Aq qorçalayıcı teşkilât, büyük ücüm başlağanından berli Qırımda «qırımtatarlarğa qarşı basqı quvetleştirildi». KrımSOS malümatına köre, fevralniñ 24-nden berli Noman Çelebicihan göñülli batalyonınıñ azası olaraq dört kişi tutuldı.
KrımSOS Qırımda siyasiy mabüslerge üküm çıqarğan qadılar cedvelini aydınlattı. 8 yıl içinde siyasiy taqiplerniñ 81 qurbanı umumen 1002 yıl ve 2 ayğa üküm etildi.
Rusiyeniñ büyük ücüminden evel Ukraina prezidenti Volodımır Zelenskıy Qırım kütleviy haber vastalarına bergen intervyüsında Kreml ukrainalı siyasiy mabüsler, hususan qırımlılarnı Rusiye apsinden azat etüv esnasını «toqtata», dep bildirdi.
Qırımnıñ Rusiye yolbaşçısı Sergey Aksenov Qırımda siyasiy mabüsler yoq, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
