Ukraina Tış işler naziriniñ birinci muavini Emine Ceppar Aqmescit SİZOsında tutulğan qırımtatar faali ve siyasetçi Nariman Celâlnıñ Qırımtatar halqı genotsidiniñ qurbanlarını añma künü munasebetinen yazğan mektübini derc etti.
«Qırımtatar halqı genotsidiniñ qurbanlarını añma kününde biz Stalin rejiminiñ qorqunç cinayetlerinden biriniñ qabaatsız qurbanlarını añamız. Bugün #Boysunmağanlar kampaniyasını devam ettirip, biz halqımıznıñ liderlerinden biri – bıltır Kreml reineleri cedveline kirsetilgen Qırımtatar Milliy Meclisi reisiniñ birinci muavini Nariman Celâlnıñ mektübini derc etemiz», – dep yazdı Ceppar Facebookta.
Derc etilgen mektüpte Celâl bütün qırımtatarlarğa muracaat ete: «Halqım, yañı sınavğa dayanmaq içün küçüñ bar. Tuvğan toprağında qaviy turmaq, onı sevmek kerek. Bu yol ne qadar qıyın ve accı olsa da, aqiqattan qorqma. Azatlıq ve adalet sevgiñni hatırla, onı yañı yollarnıñ asfaltına töşemege izin berme, onı duşmanlarnıñ qolundan sahte eyilikke deñiştirme. Keçmişte dayandıñ, bugün de dayanırsıñ».
Ceppar qayd etkenine köre, Rusiye Celâlğa Aqmescit rayonındaki gaz borusına zarar ketirgeninde «tamamen uydurılğan qabaatlav» bildirdi.
«İşğalciler «teşkilâtlanğan gruppa erkânında diversiya» ve «patlayıcı maddelerni qanunsız satın aluv, saqlav ve taşuv» aqqında ayta. Bunıñ ayrı bir tsinizmi gaz borusı zarar körgen künü Nariman Celâlnıñ Kyivde «Qırım platforması» sammitinde bulunğanı ola. Rusiyelilerniñ areketi bunıñ intiqamından başqa bir şey degil. Onıñ Faal vatandaş areketi, Qırımnıñ Rusiye ilhaqını tanımaması apis cezasınıñ sebebi oldı», – dep ayttı Ceppar.
Onıñ qayd etkenine köre, 1944 senesiniñ sürgünligi «maqsadı Qırımnıñ tamır halqlarından birini yoq etmek olğan belli bir aktsiya» edi. «Ne yazıq ki, XXI asırda qırımtatar halqına qarşı 2014 senesi Rusiye Qırımnı işğal etken soñ kene başlağan repressiyalar aqqında aytmağa mecburmız. O vaqıttan berli Rusiye işğalcileri uydurğan cinaiy davalar boyunca yüzlernen Ukraina vatandaşı, hususan qırımtatarları siyasiy repressiyalarnıñ qurbanları oldı», – dep yazdı Ceppar.
Çarşenbe künü, mayısnıñ 18-nde, qırımtatarlarnıñ sovetler rejimi tarafından Qırımdan sürgün etilüviniñ 78 yılı ola. Bu künde Ukraina ve dünyada qırımtatar halqı genotsidiniñ qurbanları añıla.
Ukraina prezidenti Volodımır Zelenskıy mayısnıñ 10-nda Nariman Celâlğa Levko Lukyanenko devlet stipendiyasını berüv fermanını imzaladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
