Çarşenbe künü, mayısnıñ 18-nde, qırımtatarlarnıñ sovetler rejimi tarafından Qırımdan sürgün etilüviniñ 78 yılı ola. Bu künde Ukraina ve dünyada qırımtatar halqı genotsidiniñ qurbanları añıla.
1944 senesi bu künde yarımadadan qırımtatarlar mindirilgen birinci eşelon çıqtı. Umumen tahminen 200 biñ insan sürgün etildi.
Ukraina Yuqarı Radasınıñ qararına köre, mayısnıñ 18-i qırımtatar halqı genotsidiniñ qurbanlarını añma künü ilân etildi.
Mayısnıñ 18-nde Ukrainada qırımtatar halqınıñ Qırımdan sürgün etilüviniñ qurbanlarını añma maqsadınen matem tedbirleri keçirile, lâkin bu yıl kütleviy tedbirlerniñ keçirilüvine Rusiye başlatqan cenk tesir etti.
Qırımtatar Milliy Meclisiniñ reisi Refat Çubarov Rusiye işğal etken Qırımda añma tedbirleriniñ ötkerilüvinen bağlı tevsiyelerni aydınlattı.
«Qırımnıñ Rusiye tarafından vaqtınca işğali şaraitlerinde qırımtatar cemaatçılığınıñ qırımtatar halqı genotsidiniñ qurbanlarını añmaq içün keçirgen bütün hatıra tedbirleri yalıñız qara şeritli qırımtatar milliy bayrağı altında keçirile. Tedbirlerde Rusiye işğalci akimiyetiniñ vekilleri ve yerli satqınlarnıñ iştirak etüvi, Rusiye işğalci timsalleriniñ qullanıluvı yasaqtır. Tedbir iştirakçilerinden Qırımdan çoqtan riayet etilmegen «COVID-19 sebebinden epidemiologik rejimge riayet etmesi» aselet talap etile bilgeni içün çeçeklerni 3-5 insanlıq kiçik gruppalarnen qoymağa tevsiye etile – şahsiy qoruv vastalarını qullanıñız», – dep yazdı Çubarov Facebookta.
O, Rusiye vaqtınca işğal etken Herson ve Zaporijjâ vilâyetlerindeki tedbirler (dua ve çeçek qoyuluvı) aqqında bildirdi.
Qırımtatar halqı genotsidiniñ qurbanlarını añma online mitingi keçirilecek. Tedbir Kyiv vaqtınen saat 16:00-da başlanacaq.
«Online mitingde çıqışta bulunacaqlar arasında – Ukraina Nazirler Şurasınıñ azaları. devlet parlamentleriniñ spiker ve azaları, cemaat erbapları, qırımtatar ve ukrain diasporalarınıñ vekilleri, Ukraina Silâlı Quvetleriniñ arbiyleri, Qırımtatar Milliy Meclisiniñ azaları», – dep bildirdi Çubarov. Tedbir ATR telekanalınıñ canlı yayında kösterilecek.
Qırımtatar sürgünligi yılınen bağlı añma tedbirleri Kanada, Litvaniya, Poloniya, Romaniya, ABD, Türkiyede ötkerilecektir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
