Ukraina Mudafaa nazirligi bir qaç yönelişte uzaq mesafeli silâ ve operativ-taktik aviatsiyanı qullanğan Rusiye ordusını tutmağa devam ete, dep bildire.
«Minsk vilâyetinden Beyazrusiyeniñ ava boşluğından A-50 uçaqlarınen ve Qırım Muhtar Cumhuriyetinden doğrulığı yüksek olğan silânen aviatsiya idare etile ve doğrultıla. Ukraina ealisini qorqutmaq maqsadınen duşman grajdan infrastrukturası ve mesken evlerni saylay. Beyazrusiyeniñ Gömel uçaq alanında piyade askerleri olğan Rusiyeniñ İl-76 uçaqları qondı. Gostomel uçaq alanınıñ uçuv yolağı zarar körgeni içün duşman Beyazrusiyeden Gomel-Çerniğiv-Kyiv tarafına ketmege qarar berdi», – dep aytıla haberde.
Berilgen malümatqa köre, Rusiye ordusı Çerniğiv mudafaası tarafından tirenüv kördi ve Kyivge ücüm etmek içün şeerni dolaşmağa tırışa. Bunıñ içün Közelets-Brovarı ve Konotop-Nejin-Kiyev yönelişine keteler. Nazirlikniñ malümatına köre, Konotop şeeri Rusiye quvetleri tarafından zapt etildi.
«Cenüpte duşman basqıncılıq planlarını kerçekleştire ve Herson, Nova Kahovka, Kahovka sıñırlarına vaqtınca işğal etilgen Qırım yarımadasına suv bermek içün Şimaliy-Qırım kanalınıñ bentini tutmaq maqsadınen çıqtı. Melitopol Ukraina şeeri içün uruşa», – dep bildire Mudafaa nazirligi.
Donetsk yönelişinde Rusiye ordusı Donetsk ve Lugansk vilâyetleriniñ memuriy sıñırlarına çıqıp olamadı. Amma ateş devam ete.
Harkiv ve Valuykı rayonında mudafaa küçleriniñ bölükleri mudafaa uruşlarını keçirmege devam ete, duşmannı toqtattılar ve sıñırda turalar, dep bildire Ukraina Mudafaa nazirligi.
«Ava quvetleri duşmannıñ ava darbelerini qaytara. Sistematik cenk areketleri devam ete. Daimiy ava ishtibaratı yapıla. Umumen Birleşken quvetler bütün çatışma boyunca duşmannı toqtatmağa tırışa», – dep bildire Mudafaa nazirligi.
Ukrainada Rusiye ücüm etken soñ arbiy vaziyet ilân etildi. Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Ücümge baqmadan, Kreml Ukrainanı işğal etmek niyetlerini red ete. Rusiye resmiy müessileri ücümnen bağlı vaziyetni pek az izaatlay, Ukraina tarafınıñ ölgen ve esir alınğan Rusiye arbiyleri aqqında malümatına cevap bermey.
Rusiye Mudafaa nazirligi snarâd ve raketalar mesken evlerge tüşkenini red ete, vatandaşlar arasında qurbanlar videosını nazirlik vekili «sahte» dep adlandırdı. Onıñ aytqanına köre, bunı «barışıqsever ealini qorquzmaq ve ğarbiy kanallarda köstermek» içün yapalar.
