Dekabrniñ 22 itibarınen Qırımnıñ bir çoq ilâchanesinde koronavirus sebep olğan pnevmoniyanıñ tedaviylevi içün kerekli ilâclar yoq. Bu aqta Qırım aq-uquq qoruyıcı gruppasında bildirdiler.
Qayd etilgenine köre, közetüv yarımadanıñ 13 şeerinde 124 aphanede keçirilgen.
“Közetüv gruppası, yerli ekimler pnevmoniyanıñ tedaviylevi içün adamlarğa tayin etilgen ilâclarnıñ ilâchanelerde bar oluvını teftiş etti. Qırımda adamlarnıñ çoqusı böyle tedaviylevni evde keçirmek mecbur, çünki yerli hastahanelerde boş yer yoq ya da hastalarnı, boş yataqlarnıñ bar oluvına baqmadan, ep bir ev tedaviylemesine yibereler”, – yazıla beyanatta.
Aq-uquq qoruyıcılarnıñ malümatına köre, közetüv neticeleri “koronavirus yuqunçı sebep olğan pnevmoniyanıñ tedaviylevi içün kerek olğan bir sıra ilâcınıñ keskin qıtlığını” kösterdi.
“Teftiş etilgen ilâchanelerniñ episinde, Covid-19 sebep olğan pnevmoniyanıñ tedaviylevi içün kerek olğan deksametazon (ampulalarda) ve gidrokortizon (ampulalarda) satılmaylar. Dünya sağlıq saqlav teşkilâtı COVID-19-nıñ ağır şekliniñ tedaviylevi içün deksametazon ve gidrokortizon kibi körtikosteroidlerniñ içeri aluvını tevsiye ete”, – qayd ettiler beyanatta.
Aksönov, yanvarniñ ortasına qadar yerli alış-veriş merkezlerinde kütleviy tedbirlerniñ keçirilüvini ve food courtlarnıñ işini yasaqladı. Qırımda tek restoranlarda degil, ofislerde de korporativ keçirilüvi yasaq etildi.
Bundan evel Qırım akimiyeti şeer meydanlarında keçirilmesi planlaştırılğan bütün medeniy-kütleviy tedbirlerni yasaqladı.
Rusiye prezidenti Vladimir Putinniñ emrinen, Rusiye Mudafaa nazirligi Yalta ve Aqmescitte yuqunç ile küreşmek içün koronavirus hastahanelerini qura.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
