Rusiye nezareti astındaki Qırım ve Aqyar musulmanları diniy idaresi, içtimaiy ağlarda tarqatılğan vasiqanı “sahte” dep adlandırdı. Vesiqada müfti “Hizb ut-Tahrir” teşkilâtınıñ azaları olğan insanlarnıñ adlarını köstergen.
QAMDİ böyle bir mektüp yoq olğanını ve müfti Emirali Ablayev “imzalap telükesizlik küçlerine yollamağanını” iddia ete.
“İçki tahqiq vaqtında sahte vesiqa acılıq ile bağlı seminarda iştirak etmek davetinen nufuzlı bir şahıslardan birine yollanğan 2019 senesi iyün ayı tarihlı mektüp esasında azırlanğan. Bunen, acılıq meselelerini nezaret etken mektüpniñ icracısı Artur Reşitovnıñ soyadı kösterilgeni añlatıla. Bundan ğayrı, vesiqa sahte olğanına blanknıñ eski şekli ve müüri delâlet ete, çünki 2020 seneden başlap Qırım Müftiyatı teşkilâtınıñ adına deñişmeler kirsetti ve bundan soñ blank şeklini ve müürni deñiştirdi. Sahteciler zemaneviy usullarnı qullanıp metinni, tarihnı, vesiqanıñ çıqqan nomerasını deñiştirdi (qırmızı tüsnen qayd etilgen)”, - yazıla bildirmede.
İçtimaiy ağlarda tarqatılğan vesiqada, müfti Emirali Ablayev “Rusiyege qarşı togerek masalar” keçirgenlerniñ adlarını bildirgeni aqqında yazılğan edi. Mektüpte, “bu adamlar musulman ümmetini böle” ve “Rusiyede yasaq etilgen “Hizb ut-Tahrir” teşkilâtınıñ devamcılarıdır”, dep yazıla. Mektüpniñ soñunda müfti Qırım ve Aqyardaki Rusiye FSB idaresine “şahıslarnıñ qanunsız areketlerini toqtatmağa” rica ete.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
