Qırımlı cemaat jurnalisti, Aqmescitteki ekinci «Hizb ut-Tahrir davasınıñ» mabüsi Ruslan Suleymanovnıñ qabaatlavı aydınlatıldı. FSB onı 205.5 maddesiniñ birinci qısmından ekinci qısmına («terror teşkilâtında iştirak etüv») deñiştirdi. Bu aqta advokat Lilâ Gemeci «Qırım birdemligi» cemaat birleşmesine haber etti.
«O, «Rusiye Federatsiyasında terror teşkilâtı faaliyetiniñ teşkilâtçısı» olaraq keçken edi, qanunda böyle tavtologiya bar. Şimdi iştirakçi olaraq qabaatlana. Cinaiy dava malümatları endi ögrenile», – dep ayttı Suleymanovnıñ imayecisi.
Şimdi imaye tarafınıñ, Gemeciniñ aytqanına köre, faaller tutulğan soñ tahqiqat bir buçuq yılda toplağan bütün delillerni baquv imkânı olacaq.
«Tahqiqat devamında bu aqqımızdan marum etilgen edik. Tahqiqatçı cinaiy-protsessual kodeksniñ 198 ve 206 maddelerindeki aqlarımıznı bozdı. Ekspertizalar belgilengende bizge tedqiqat obyektleri berilmedi, tahqiqat vaqtında alternativ ekspertizanı sımarıp olamadıq, bu ekspertizalarnı kim yapacaq bilmegenimiz içün ekspertni red etip olamağan edik. Bu bozuvlarnı protokollarda qayd etken edik», – dep qayd etti advokat.
Gemeciniñ fikirince, qabaatlav abstrakt ola ve endi mahküm etilgen ya da mahkeme tahqiqatı esnasında bulunğan evelki Qırımdaki «Hizb ut-Tahrir davalarınıñ» vesiqalarını kopiyası ola.
«Bir-birinen aynı olğan davalar faal semetdeşlerimizni taqip etmek içün alet ola ve olarnıñ vatandaş fikrini bastırmaq içün qullanıla», – dep qoştı Gemeci.
Advokatnıñ aytqanına köre, Ruslan Suleymanov davada terciman hızmetlerinden faydalana, çünki bütün ariza ve muracaatlarnı qırımtatarca bere.
Ukraina prezidenti Volodımır Zelenskıy Türkiye prezidenti Recep Tayyip Erdoğan ile telefonda laf etip, Rusiye tarafından tutulğan Ukraina vatandaşları, hususan qırımtatarlarnı azat etüv meselesinde iş devam etmeli, dep ayttı. Cedvellerde Ruslan Suleymanov da bar.
Ruslan Suleymanov 2019 senesi mart ayında tutuldı, o vaqıttan berli SİZOda buluna. FSB, onı Rusiyede ve işğal altındaki Qırımda yasaqlanğan «Hizb ut-Tahrir» teşkilâtında iştirak etkeninde qabaatlay.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
