Bugün Ukrainada Ğolodomor qurbanlarını añma künü qayd etile.
Kyivde cumaertesi künü, noyabrniñ 23-nde, dualar oquldı, hatıra tedbirleri keçirildi, sergiler açıldı ve «Çıraq yaq» ananeviy aktsiyası keçirildi, medeniyet ve oquv müessiselerinde sergi keçirilmesi, film kösterilüvleri planlaştırıla, dep bildirdi Kyiv şeeriniñ devlet memuriyeti.
«Er yıl noyabrniñ dördünci cumaertesi künü qayd etilgen Ğolodomor qurbanlarını añma kününde paytahtta matem tedbirleri, dualar, hatıra tedbirleri, sergiler ve «Çıraq yaq» ananeviy aktsiyası keçirilecek. Olarnıñ maqsadı 1921-1923 ve 1946-1947 seneleriniñ ukrain halqınıñ genotsidi ve açlıq olğan 1932-1933 seneleriniñ Ğolodomor qurbanlarını lâyıq seviyede añmaqtır, tedbirlerniñ planı tasdıqlandı», – dep aytıla paytahtnıñ yolbaşçılıq saytında.
Noyabrniñ 23-nde Ğolodomor-genotsid milliy müzeyinde (Lavrskaya soq., 3) matem tedbirleri keçirilecek. Devlet akimiyet organları, yerli idare, cemaat vekilleri, diniy liderler, çetelden kelgen musafirler qoşulacaq.
Saat 16:00-da (Qırımda 17:00-da) ğolodomor qurbanlarınıñ hatırasına sükünet daqqası ilân etilecek, «Çıraq yaq» umumukrain aktsiyası keçirilecek. Er kes elâk olğanlarnı añıp, penceresinde çıraq qoya bile.
Cumaertesi künü Kyivde Ukraina devlet bayrağı endirilecek.
Eglence tedbirleriniñ keçirilüvi sıñırlanacaq ve kütleviy haber vastalarınıñ yayınları deñiştirilecek.
Noyabrniñ 23-nde ibadethanelerde Ukrainada ğolodomor neticesinde elâk olğanlar añılacaq.
