Saba Kezlevde yağğan sağanaq neticesinde şeerniñ bir qaç rayonı suv altında qaldı. Bu aqta Qırım kütleviy haber vastaları bildire.
İçtimaiy ağlarda şaatlar bozulğan avanıñ foto ve videolarını derc ete.
Kezlev memuriyetiniñ yolbaşçı vazifelerini vaqtınca eda etken Roman Tihonçuk şeerdeki sağanaq kanalizatsiyaları yağanaqlarğa dayanamağanını tanıdı.
«O, (Kezlevdeki sağanaq kanalizatsiyası – QA) sovetler vaqtında qurulıp, o vaqıttan berli yahşı çalışa edi. Ve bugünki yağmurlarda böyle problem bar… Eki yıl içinde onı al etermiz, büyük felâket yoq: er şey temizlene, yigirmi daqqadan soñ bütün soqaqları quru olacaq», – dep bildire Tihonçuknıñ aytqanlarını «RİA Novosti Krım» Rusiye neşiri.
Daa evel haber etilgeni kibi, Qırımda iyülniñ 23-24-nde boranlı yağmur, burçaq yağması ve saniyede 25 metr süratınen yel esmesi beklenile. Qırımdaki Rusiye Fevqulâde vaziyetler nazirligi furtuna havfı aqqında ilân etti.
