Penzanıñ 20 mektebinde prokuraturanıñ talabı ile mektep qıyafeti qaideleri deñiştirildi. Talebelerge hicap kiyip yürmege yasaq etildi. Bu aqta «Nastoyaşçeye vremâ» telekanalı haber ete.
Penzanıñ Oktâbr rayonınıñ prokuratura qararına köre, mektep qıyafeti qaidelerinde diniy urba, hususan hicap, diniy baş örtüleri, diniy timsallernen qıyafet kiyilmesi dos-doğru yasaqlanmağan edi.
«Ekstremist faaliyetine qarşı esas qaidelerge riayet etmek ve bu umumtasil teşkilâtlarnıñ müdirleri adına çağına yetmegenlerniñ aq ve serbestligine uymaq maqsadınen rayon prokurorı teklifte bulundı, o, baqıldı ve qanaatlendirildi. Talebelerniñ tışqı körünişi talapları qanun talaplarına uyğun olaraq belgilendi», – dep aytıla haberde.
Mektepniñ on eki hadimi intizamiy mesüliyetke çekildi, dep aytıla prokuraturanıñ esabatında.
Prokuraturanıñ qayd etkenine köre, Rusiye qanunları lâdiniy tasil esaslarını pekitip, talebelerge devlet umumtasil müessiselerinde din kütmek aqqını bermey.
