Qırımtatar Milliy Meclisiniñ reisi, Ukraina halq deputatı Refat Çubarov Ukrainada yaşağan pravoslav hristianlarnı Pashanen tebrikledi.
«Sayğılı vatandaşlar – 2019 senesi aprelniñ 28-nde İsanıñ tirilüvini qayd etken hristianlar! Qırımtatar Milliy Meclisi adından er kesni Pashanen hayırlay, qorantalarıñızda amanlıq, razılıq ve baht olmasını tileyim. Bes-belli, bu bayram künleri Ukrainanıñ azatlığı ve mustaqilligi içün canını feda etken Sema Yüzü Qaramanları ve Ukrainanıñ imayecileri, Rusiyeniñ silâlı istilâsı neticesinde elâk olğanlar ayrıca añılacaq», – dep yazdı Çubarov Facebook saifesinde.
Siyasetçi Ukraina vatandaşlarına memleketniñ topraq bütünligini ğayrıdan tiklemek içün birleşmesini tiledi.
«Epimizge, çeşit din müminlerine, halqara seviyede tanılğan sıñırlarda, Qırım Muhtar Cumhuriyeti ve Aqyarnen beraber Ukraina devletiniñ topraq bütünligini ğayrıdan tiklev işinde birlik ve cesaret, küç ve israrlıq olmasını tileyim. Rabbim Ukrainanı qorusın!», – dep qayd etti Çubarov.
Ukraina prezidenti Petro Poroşenko Pasha ile hayırlap, dualarda «duşmannıñ apishanelerinde tutulğan ukrainalı esir ve mabüslerni» hatırlamağa çağırdı.
Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız şekilde tuta. Olarnıñ sırasına 2018 senesi noyabrniñ soñunda Qara deñiz yalısında zapt etilgen 24 ukrainalı deñizci ve Donbastaki esirler kirmey.
Haber etilgeni kibi, aprelniñ 27-nden 28-ne keçer gecesi Qırımnıñ pravoslav ibadethanelerinde Pasha bayramınen bağlı ibadetler qılındı.
Qırımnıñ Rusiye yolbaşçısı Sergey Aksenov qırımlılarnı Pashanen tebrikledi.
Pasha ya da Mesihniñ Tirilüvi – İsa Mesihniñ tirilüvi şerefine qutlanğan qadimiy hristian bayramı. Onıñ künü er yır deñişe ve ay-küneş taqvimine köre tayinlene.
Rusiyeniñ Qırım işğalinden soñ Kreml kontrolindeki yarımada akimiyeti Ukraina Pravoslav kilsesiniñ Qırım yeparhiyasına ait binalarnıñ bir qısmını zapt etti.
Ukraina Pravoslav kilsesi, Ukraina ükümeti ve Kyiv patriarhatı Ukrain pravoslav kilsesiniñ Aqmescit ve Qırım arhiyepiskopı Kliment dünya toplulığını Qırımdaki Ukraina vatandaşlarınıñ milliy, medeniy ve diniy aqlarını qorçalamasına çağırğan edi.
Qırım ve Aqyarnıñ pravoslav ibadethaneleri ve cemiyetleriniñ büyük qısmı Moskva patriarhatınıñ Ukraina Pravoslav kilsesine boysuna.
