Qırımda «Suvuq Sala – Sudaq» yolunda mayısnıñ 3-nde Sudaq tarafına ketken Neoplan avtobusı Taraqtaş (Daçnoye) köyü rayonında yoldan çıqıp, bir tarafqa avdı, dep haber ete Qırımdaki Rusiye Fevqulâde vaziyetler nazirligi idaresiniñ matbuat hızmeti.
«Avtobusta 37 insan bar edi. Kimse yaralanmadı, er kes naqliyat vastasını özü terk etti. Qaza sebepleri ögrenilmekte», – dep aytıla haberde.
Aqmescit – Yalta yolunda aprelniñ 26-ndan 27-ne keçer gecesi Eski Orda (Lozovoye) köyü rayonında Chevrolet-Lacetti ve Mersedes Vito maşinaları çatıştı. Qırımdaki Rusiye İç işler nazirliginiñ idaresi qaza neticesinde beş insan elâk oldı, dep bildirdi.
2018 senesi dekabr ayında Qırım qurtarıcıları Qırımda büyük yol qazalarınıñ sayısı arttı, dep bildirdi. Qırımda 2019 senesiniñ ilk üç ayı içinde keçken seneniñ aynı müddeti içinde mesüliyetke çekilgen aydavcılarnıñ sayısı bir buçuq qat ziyade oldı.
