Kreml kontrolindeki Qırım yolbaşçısı Sergey Aksönov Keriçniñ Rusiye memuriyetine çöplük çıqarılmasınen bağlı meseleni al etmege emir etti: 30 kün içinde çöplük içün yañı yerlerni tapıp, şeer içindeki eski soylarını qullanmamaq kerek. Bu aqta Aksönov fevralniñ 21-nde Keriçniñ Rusiye memuriyetiniñ toplaşuvında ayttı.
«30 kün içinde bir noqta qoyayıq. Daa ziyade vaqıt bermem. Keriçten qalımtılarnı çıqaruv shemasını deñiştirmege añlaştıq. Belli bir müddet eski obağa taşıysıñız, mesken yerde bir çöplük obası olmasın. Yedi Quyuda da şu cümleden», – dedi Aksönov.
Keriçte 2019 senesiniñ başında kommunal hızmetler çöplükni çıqarıp taşımağan soñ şeer rayonlarındaki çöplük qutuları ve civarları tolu edi. Keriçniñ bazı merkeziy soqaqlarında çöplükni piyade alanlarında qaldırmağa başladılar.
Daa evel Rusiyeniñ onlarnen regionında fevralniñ 3-nde akimiyetniñ çöplükni yoq etüv meselesine dair siyasetine qarşı narazılıq aktsiyaları keçirildi, dep haber etilgen edi.
2018 senesiniñ soñunda Rusiye Devlet dumasınıñ ekologiya komiteti Rusiyeniñ bazı regionlarında ve ilhaq etilgen Qırımda «çöplük felâketi» olacağını tahmin etken edi.
Fevralniñ 21-nde Aksenov Keriçteki naqliyat işini begenmeyip, Keriç şeer yolbaşçısınıñ muavini vazifesinden Dilâver Melgaziyevni boşatmağa emir etti.
