Kreml kontrolindeki Qırım Yuqarı mahkemesi Bağçasaraydaki ekinci «Hizb ut-Tahrir davasınıñ» mabüsi Memet Belâlovnı nezaret altında qaldırdı. Advokat Edem Semedlâyevniñ Qırım.Aqiqatqa bildirgenine köre, Belâlov 2019 senesi fevralniñ 9-na qadar nezaret altında qalacaq.
Advokatnıñ aytqanına köre, oturışuv «standart» oldı, mahkeme Belâlov «saqlana ve şaatlarğa tesir ete bile», dep bildirdi. Mahkemede kerekli ekspertizalarnı keçirmege yetiştirmegenlerini de ayttılar.
«Daa bir kere bizim işimiz olmağanını, mabüsniñ işi olmağanını bildirdik… Semeresiz tahqiqat, tahqiqat tedbirleriniñ semeresiz teşkil etilmesi içün sağlığını berecekmi? Buña emiyet bermediler. Oturışuv qapalı oldı, babası ve anasına qarar seslendirilgende kirmege izin berildi», – dep qayd etti Edem Semedlâyev.
Bundan evel Rusiyeniñ Qırım Yuqarı mahkemesi Bağçasaraydaki ekinci «Hizb ut-Tahrir davasınıñ» mabüsleri Timur İbragimov ve Ernes Ametovnı fevralniñ 9-na qadar apiste qaldırdı.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
