“Akvarium” Rusiye rok-taqımı Ukrainada dekabrde keçecek kontsertlerini lâğu etti.
“Yazıq, amma fors-major sebebinden Ukraina turnemizni şimdi keçirip olamaymız”, - yazdı Facebook saifesinde taqım lideri Boris Grebenşçikov. “Fors-mojor unutılır” ve “Akvarium”nıñ Ukrainda kontsertleri kelecek yılda keçer” dep ümüt etkenini yazdı o.
Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti. Cenk vaziyeti devam etkence Ukrainağa 16 yaşından 60 yaşına qadar Rusiye erkek vatandaşları kirsetilmecek. Devlet sıñır hızmetinde, olarnı sübet ve vesiqa teşkerüvinden soñ ayrı allarda keçire bileceklerini qayd ettiler. Sıñır keçken adamlarnıñ aytqanına köre, atta qadınlarnı da er vaqıt sıñırdan keçirmeyler.
Ukraina Devlet Sıñır hızmeti, bir künde sıñırdan 100-ge qadar kişi keçirilmegenini bildirdi. Ne qadarı keçirildi - haber etilmey. Bundan ğayrı, Rusiye 40-qa qadar ukrainalını kirsetmegeni aqqında malümat bar, amma Rusiye resmiy sıñırlayıcı tedbirlerni kirsetmegen edi.
Boris Grebenşçikov yaqında 65 yaşını toldurdı. 2014 senesi Rusiye-Ukraina çatışuvından soñ, o bir qaç kere Kyiv ve başqa ukrain şeerlerine kontsertlernen kele edi. “Akvarium” lideri, ukrain siyasiy mabüsleri Oleg Sentsiv ve Aleksandr Kolçenkonı azat etmege çağırtıp, Amnesty International teşkilâtınıñ uquq qoruyıcı marafonında iştirak etti.
