Qırımda Aqmescit SİZOsında tutulğan “Veciye Kaşka” işiniñ iştirakçisi Bekir Degermenciniñ alı fenalaşqan. Bu aqta Qırım.Aqiqatqa adliyeci Edem Semedlâyev izolâtorda tutulğan imayesi altındaki şahısnı ziyaret etken soñ haber etti.
”O, daima ingalâtorlar qullanğanını körip, alı fenamı dep soradım. Hastalıq (bronhial astma) sezondan dolayı keskinleşip başladı, dep cevap berdi”, - dep izah etti Semedlâyev.
Adliyeci, sentâbrniñ 19-nda tahqiqatçı cinayet işi boyunca ilk tahqiqat bitkeni aqqında ilân etkenini ayttı. Bu sebepten Degermencige nihaiy qabaatlav aqqında aytılıp, o daa bir kere sorğulandı.
“Bundan soñ bizler cinayet işi materiallarınen ögrenmege başlaymız. Şimdilik ne qadar sürecegini aytıp olamayım”, – dep ilâve etti Semedlâyev.
2017 senesi noyabrniñ 23-nde Aqmescitte Rusiye telükesizlik hadimleri – Kâzim Ametov, Asan Çapuh, Ruslan Trubaç ve Bekir Degermenci kibi bir gruppa qırımtatarnı tutıp aldı. Olar Türkiye vatandaşından para talap etüvde qabaatlandı. Rusiye telükesizlik hadimleri olarnı tutqan maalde qırımtatar milliy areketiniñ veteranı Veciye Kaşka yaramay. Daa soñra belli olğanı kibi qadın vefat ete.
Bekir Degermenciniñ – hronik astma hastalığı bar. SİZOda onıñ alı daa ziyade fenalaşa. Qırım Yuqarı mahkemesi zalına faalge dep “acele yardım” çağırıla.
Dekabrniñ 14-ne keçer gecesi o reanimatsiyağa tüşe, bundan soñ o pulmonologiya bölügine keçirile. 2018 senesi yanvarniñ 2-nde faal tekrar SİZOğa qaytarıla.
Qırımtatar faal Asan Çapuh SİZOda mikroinsult keçirip, acele sürette hastahanege yatqızılmağa kerek ola. Yılbaşı bayramı tatillerinden evel tevqif etilgen şahıs tıbbiy nezaretten keçe, ancaq adliyeci onıñ sağlıq vaziyeti ve diagnozı aqqında iç bir şey bilmey.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan “Hizb ut-Tahrir” ile alâqası olğanında şeklengen musulmanlarnıñ evlerinde sıq-sıq tintüvler keçirip başladı.
