AQŞ Devlet departamentiniñ Ukraina boyunca mahsus temsilcisi Kurt Volker, ilhaq etilgen Qırım ve işğal etilgen Donbasstan vazgeçken ukrain siyasetçisi “saylâvlarda ğalebe qazanmağa ve devletni idare etmege” fursatı olmaz dep saya. Bu fikirni o “RBK-Ukraina”ğa bergen intervyusında bildirdi.
“Rusiye tarafından Ukrainanıñ istilâsı ve bir qısmını ilhaq etüvi er zamandan daa ziyade birleşken, ğarp tarafdarı olğan, milletçi ve Rusiyege qarşı olğan bir Ukrainağa çevirdi. Olarnıñ strategiyası yutqızdı. Şimdi ise olar Ukrainada olacaq saylâvlarda elverişli netice alacaqlarına ümit ete. Men bellesem, olar bir daa yañlış esap yapalar. Memleket ep deñişe, Qırım ve Donbasstan vazgeçken ukrain siyasetçisi saylâvlarda ğalebe qazanmaq ve devletni idare etmek fursatını qaçırır”, - dey Volker.
2014 senesi martnıñ 16-nda Qırım ve Aqyarda yarımadanıñ statusı boyunca dünyada qabul etilmegen referendum ötkerildi. Bunıñ neticesinde Rusiye Qırımnı özüne qoşqanını ilân etti. Ukraina, Avropa birligi ve ABD bunı tanımayıp, Qırım Rusiye tarafında işğal etilgenini tasdiqladılar. Martnıñ 18-nde Rusiye prezidenti Vladimir Putin Qırımnı Rusiyege “qoşulğanı” aqqında ilân etti.
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
Rusiye tarafından Ukrainağa ait Qırım yarımadasınıñ ilhaq etilmesi ve Ukrainanıñ şarqındaki çatışmanıñ başlanmasından soñ Moskva ile Ğarp devletleri arasında munasebetler keskinleşti. Kyiv ve Ğarp Rusiyeni separatistlerge silânen yardım etkeninde qabaatlay. Kreml bu qabaatlavlarnı inkâr ete ve Donbassta olsa bile, rusiyeli “göñülliler” bardır, dey. BMTniñ malümatına köre, çatışma esnasında 10 300-den ziyade kişi elâk oldı.
2019 senesi Ukrainada Ukraina prezidenti ve Yuqarı Şura saylâvları keçirilmesi qararlaştırıla.
