Qırımda mahküm etilgen ukrain faali Vladimir Baluh vasiyetname yazacaq, dep bildirdi Ukraina Yuqarı Radasınıñ insan aqları vekâletlisi Lüdmila Denisova.
«Vladimir Baluh qasevetlene: notariusnı alıp kelmege rica etti. Sentsov kibi vasiyetname yazacaq. Bütün qorquzuvlar tek lafta qalmaycağını, kologiyağa qadar barmağa imkânı olmaycağını is ete», – dep yazdı Denisova Facebookta.
Ombudsmenniñ haber etkenine köre, o, Rusiye zenaatdaşı Tatyana Moskalkovadan eki «şey talap ete»: Baluhqa kerekli tibbiy yardım kösterilmesini ve onıñ faalnen körüşüviniñ teşkil etilmesini.
Denisova, Rusiye akimiyetinden onı Aqmescit SİZOsında Vladimir Baluh ile körüştirmege talap etken edi.
Qırımda apiste tutulğan ukrain faali Vladimir Baluh 2018 senesi martnıñ 19-nda başlağan müddetsiz açlıqnı devam ete. Bir aydan berli bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.
İyülniñ 5-nde Rusiye kontrol etken Aqşeyh rayon mahkemesi ukrain faali Vladimir Baluhqa 5 yıl apis cezası ve 10 biñ ruble (4 biñ grivna) para cezasını tayin etti.
Faal eki cinaiy iş boyunca böyle ceza aldı.
FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
