Rusiyeli telükesizlik hadimleri sentâbrniñ 13-nde saba Bağçasarayda yaşağan qırımtatar faali Osman Belâlovnıñ evinde tintüv keçirgeni, ictimaiy ağlarda paylâşqan haberi içün sentâbrniñ 4-nde 12 künge tevqif etilgen “Qırım birdemligi”niñ faali Marlen Mustafayevge qarşı aşılğan cinayet işinen alâqalı.
Bu aqta Qırım.Aqiqatqa Bilâlov lar ailesiniñ adliyecisi Ayder Azamatov haber etti.
“Men Aqmescitte Kiev rayonınıñ Tahqiqat komitetini ziyaret ettim. Haber etkenlerine köre, Osman Belâlov – Mustafayevniñ işi boyunca şaat ola eken. Ana-babasına mahkemeniñ tintüv boyunca munasip qararını köstergenler”, – dep ikâye etti adliyeci.
Onıñ sözlerine köre, aqrabaları Bağçasaraynıñ rusiyeli politsiya bölügine Osman Belâlov ğayıp olğanına dair ariza yazğanlar, lâkin onıñ ne yerde olğanı aqqında ale daa bir malümat yoq.
Sentâbrniñ 13-nde saba rusiyeli telükesizlik hadimleri “Qırım birdemligi”niñ faali Osman Belâlovnıñ evinde tintüv ötkerdi. O, Bağçasaraydaki “Hizb ut-Tahrir davası”nıñ iştirakçisi Memet Belâlovnıñ qardaşı ola. Tintüvden soñ Belâlovlarnıñ babası tutulıp alındı.
Ukraina Tış işleri nazirligi ”Qırım birdemligi”niñ faali Osman Belâlovnıñ evinde tintüv yapılğanını taqbih etti.
2016 senesi Qırımnıñ rusiyeli mahkemesi Osman Belâlovqa 10 biñ ruble para cezası tayin etken edi. O, 2016 senesi mayısnıñ 12-nde Bağçasaraydaki “Salaçıq” kafesi yanında “ruhsetsiz mitingte” iştirak etüvde qabaatlanğan edi. O künü faaller rusiyeli telükesizlik hadimleri qırımtatarlarda tintüv yapqanını eşitip, kafe yanında toplanğan ediler.
