Sentâbrniñ 13-nde saba evinde rusiyeli telükesizlik hadimleri tintüv yapqan “Qırım birdemligi”niñ faali Osman Belâlovnıñ aqrabaları onıñ ne yerde olğanını tapalmay. Bu aqta Qırım.Aqiqatqa qırımlı uquqçı Nazim Şeyhmamabetov habet etti.
“Şimdilik o tek saba evinden çıqıp ketkenini bilemiz. Tahminen saba saat 7-de bağ üzülgen. Temelli haberimiz olğan şey şudır ki, oña nisbeten – milletlerara ve dinlerara zıddiyet qozğatuv boyunca 282 maddeniñ 1 qısmına binaen cinayet işi açılğan. Şimdi aqrabaları oğlu hırsızlanğanı ve ğayıp olğanı boyunca ariza yazıp politsiya bölügine muracaat etken. Beñzer işlernen oğraşqan uquqqorçalav organlarınıñ canlı telefonlarınen bağlanğanlar”, – dedi Şeyhmambetov.
Onıñ sözlerine köre, telükesizlik hadimleri “acele ve tez” tedbir alması içün politsiya bölügi ögüne insanlar toplaşa.
Sentâbrniñ 13-nde saba rusiyeli telükesizlik hadimleri “Qırım birdemligi”niñ faali Osman Belâlovnıñ evinde tintüv ötkerdi. O, Bağçasaraydaki “Hizb ut-Tahrir davası”nıñ iştirakçisi Memet Belâlovnıñ qardaşı ola. Tintüvden soñ Belâlovlarnıñ babası tutulıp alındı.
Ukraina Tış işleri nazirligi ”Qırım birdemligi”niñ faali Osman Belâlovnıñ evinde tintüv yapılğanını taqbih etti.
2016 senesi Qırımnıñ rusiyeli mahkemesi Osman Belâlovqa 10 biñ ruble para cezası tayin etken edi. O, 2016 senesi mayısnıñ 12-nde Bağçasaraydaki “Salaçıq” kafesi yanında “ruhsetsiz mitingte” iştirak etüvde qabaatlanğan edi. O künü faaller rusiyeli telükesizlik hadimleri qırımtatarlarda tintüv yapqanını eşitip, kafe yanında toplanğan ediler.
