Ukraina silâlı quvetleri Azaq yönelişinde arbiy quvetlerini arttırdı dep haber ete USQ Qara quvetler komandani Sergey Popko özüniñ Facebook saifesinde.
“Rusiye Federatsiyasınıñ Azaq deñizindeki agressiv areketlerine qarşı Ukraina Silâlı quvetleri Baş ştabınıñ qararına binaen Azaq yönelişinde şu cumleden Silâlı quvetlerniñ Qara quvetler gruppirovkası arttırıldı”, – dep yaza Popko.
O, USQ regionda vaziyetni tolusınen nezaret etkeni, gemiler gruppirovkasınıñ areketlerine qol tutqanı ve deñiz sailiniñ işançlı mudafaasını temin etkeni aqqında ayttı.
“Umumiy arbiy brigadalar, sail mudafaa brigadaları, ordunıñ raketa bölükleri ve topçılar, arbiy uçaq bölüklerinen beraber daima anda buluna ve nezaret etemiz”, – dep ilâve etti Popko.
Sentâbrniñ 6-nda Ukraina milliy havfsızlığı ve mudafaa Şurası Azaq deñizinde arbiy-deñiz quvetleriniñ arttırılacağına dair qarar qabul etken edi.
Oquñız: Azaq deñizinde qarşı turuv: Ukraina Rusiye tecavuzına nasıl cevap bere
Mayıs ayınıñ ortasında, Keriç köpüriniñ maşnalar yürecek qısmı yekünlengen soñ, haberlerge köre Rusiye, Kaspiy deñizinde qaydlı deñiz gemilerini, şu cumleden arbiy soylârını da Azaq deñizine keçirdi. Bu arada Moskva strategik obyekniñ etrafını qorçalamaq kerek olğanına esaslana.
Şundan berli Rusiye 148 dane ukrain ve çetel ticaret gemisini toqtatıp, işbu gemilerde bulunğan ekipaj hadimlerinen diger şahıslarnı sorğuladı.
