İlhaq etilgen Qırım Dnipro suvınen teminlenmeycek, andaki miqdar ealige yeter, dep ayttı sentâbrniñ 10-nda Ukraina prezidentiniñ Qırım MC daimiy temsilcisi Boris Babin“112 Ukraina” televizion kanalınıñ efirinde.
Al-azırda Qırımda olğan suv miqdarı ealige yeter dep qayd etti o.
“Bugün de-bugün Qırımnıñ Dnipro suvuna muhtac: iqtisadiyat toqtay, suv ambarları boş. Eali içün bu bir telükeli teşkil etmey. Ealiniñ içmesine yetecek qadar suv bar. Bu işhanler içün bir problemadır. Şunıñ içün, biz bundan haberdarmız, belli bir seviyelerde toplaşuvlar ötkerildi ve Moskvadan – ne yapıp-yapıp suvnen teminlensin denildi. Men ise: ne yapıp-yapıp olsa da suv bermemmiz, çünki ealiniñ suvğa ihtiyacı yoq”, – dedi Babin.
Daa evel vaqtınca işğal etilgen territoriyalar ve devlet içinde köçken şahıslar meseleleri naziriniñ muavini Yuriy Grımçak Ukraina yarımadanı suvnen teminlev meselesini baqa bile, lâkin Rusiye yarımadanı ilhaq etkenini tanımalı.
MEVZUĞA DAİR: Qurğaqlıq ve artqaç suv: Qırım ve Herson fermerleriniñ kündelik ayatı
İyül ayınıñ başında Qırımnıñ şarqında yerleşken mesken yerlerinde ealiniñ suvnen teminlenüvi olduqça fanalaşqan edi.
Avgustnıñ 23-nden 24-ne keçer gecesi Ermeni Bazardaki “Qırım titanı” zavodından kimyeviy taşlantı atılğanı qayd etildi. Qırım memuriyeti yarımada şimalinde zararlı maddelerniñ avağa atıluv sebebi sıcaqtan ve uzun muddet yağış olmağanıdan dep beyan etken edi.
Faqat Kyiv, Qırımda kimyeviy taşlantılarnıñ avağa atılmasına Rusiye arbiyleri sebepçi olğan dep iddia ete, çünki olar idman yapqanda titan ve soda zavodlarınıñ taşlantılarına ateş açqan emiş.
Ukraina Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminley edi. 2014 senesi Rusiye Qırımnı işğal etken soñ, yarımadağa suv berilmesi toqtatıldı.
