Sentâbrniñ 9-nda “Qırım titanı” zavodı istisalnı bütünley toqtattı dep haber ete Rusiyeniñ “RİA Krım” neşiri ilhaq etilgen Qırım adına Rusiye Devlet dumasınıñ deputatı Mihail Şeremetniñ sözlerine esaslanıp.
“Soñki ocaq bazar künü kündüz toqtatıldı. İstisal esnası ekologiyağa zarar bermeycek şekilge ketirilmeli”, – dey Şeremet.
Deputat, Kreml nezareti altındaki Qırım yolbaşçısı Sergey Aksönovnıñ avalesine binaen zavod “istisalnıñ tehnologik esnası modernleştirilgen ve yoqlama yapılğan son” ğayrıdan çalışıp başlaycaq dedi.
Aynı zamanda sentâbrniñ 9-nda, bir ukrian telekanalınıñ efirinde Herson valisi Andrey Gordeyev, sentâbrniñ 9-nda saba “Qırım titanı” zavodınıñ boruları tütiy, o evelkisi kibi çalışmağa devam ete, kimse istisalnı toqtatmaq niyetinde degil”, dep qayd etken edi.
Avgustnıñ 23-nden 24-ne keçer gecesi Ermeni Bazarda malüm olmağantaşlamalar qayd etildi. Sentâbrniñ 4-nde Rusiye nezareti altındaki Qırım yolbaşçısı Sergey Aksönov avada bulunğan zararı maddeler qoyulığı qabil sıñırnı aşqanı aqqında ilân etti.
Bundan dolayı eki aftağa şeerden balalarnıñ çıqarılmasına ve aynı muddetke “Qırım titanı” zavodınıñ işi toqtatılmasına qarar berilgen edi.
Mevzuğa dair: «Şeer – ceennem kibi!». Ekşilik taşlantılarından soñ Ermeni Bazarnıñ ayatı.
Qırım memuriyeti aytqanına köre, zararlı maddeler taşlantılarınıñ sebebi yarımada şimalinde “Qırım titanı” qullanğan ekşilik havzularından çıqqan buvlanuvdan olğan eken. Uzun yıllar devamında istisal taşlantıları aqızılğan havuz sıcaqtan dolayı quruğan dep iddia ete memurlar.
Ermeni Bazarda yüz bergen kimyevit taşlantılardan Herson vilâyetiniñ sakinleri de zarar kördi. Olar kimyeviy zeerlenüv alâmetlerinen hastahanelerge muracaat eteler.
Bundan da ğayrı, Qırımdaki taşlantılar sebebinden alsızlanğanına şikâyet eterek, tıbbiyet hadimlerine 61 ukrian sıñırcısı muracaat etken (olarnıñ epsi yarımada memuriy sıñırında hızmet ete). Olarnıñ beşi hastahanege yatqızdırılğan dep haber ete Ukraina Devlet sıñır hızmetiniñ temsilcisi Oleg Slobodyan.
Ukraina memuriyeti halqara teşkilâtarnı işbu vaziyetke kirişmege rica ete.
