Sentâbrniñ 6-nda Yaltada küçlü yağmurdan soñ sabıq “Spartak” kinoteatri yanında Marşak meydanındaki yerastı keçitni suv bastı dep haber ete Qırım.Aqiqat muhbiri.
“Spartak” toqtav yerindeki yerastı keçit – meydannı kesip keçmek içün uyğun olğan yekâne yer sayıla. Yağğan küçlü yağmur eki saat içinde keçit tonnelini tavanına barğance suvnen toldurıp taşladı.
Bir saattan soñ suv basqan yerge Qırımda rusiyeli FVN İdaresiniñ hadimleri kelerek, suvnı boşatıp başladı.
Suv keçitni ne sebepten basqanı malüm degil, şeer memuriyetiniñ de temelli bir fikri yoq.
Daa evel Qırım sinoptekleri yarımadağa keleyatqan fırtına, küçlü yel ve burçaq aqqında acele tenbiyelev bildirgen ediler.
