Rostov-na-Donuda Şimaliy-Kavkaz okrugınıñ arbiy mahkemesi sentâbrniñ 5-nde keçken ilk oturışuvında Aqmescitteki “Hizb ut-Tahrir işi”nen bağlı materiallarnı ilâve tahqiqat yapılmaq kerekligi sebebinden prokuraturağa keri qaytardı.
Qırım.Aqiqat muhbiri haber etkenine köre, qabatlanğan beş kişi şu cumleden Rustem İsmailov Ayder Saledinov, Emil Cemadinov Uzeir ve Teymur Abdullayevniñ tevqifi üç ayğa uzatılğan edi. Olar yanvarniñ 11-ne qadar SİZOda qalacaq.
“Bizim içün beklenilmegen bir qarar oldı. Daa bir afta evel başqa yerge yollanılacaq eken, şimdi iç olmağanda Yañı yılğace Rostovda makhkeme lâğu etile. Adliyeciler aytqanına köre, bu qarar iş materiallarında pek çoq hatağa yol qoyulğanı sebebinden qabul etilgen. Atta qabaatlavnıñ özünde de hatalar bar eken”, – dep ayttı Uzeir Abdullayevniñ apayı Fera.
Daa evel avgustnıñ 21-nde Rıstov-na-Dobıuda aynı mahkeme Yaltadaki “Hizb ut-Tahrir işi”nen bağlı materiallarnı da Qırım prokuraturasına keri qaytarmağa qarar bergen edi.
2016 senesi oktâbrniñ 12-nde Qırımda beş musulman qorantasında tintüvler yapıldı. Neticede, Rusiye ve o ilhaq etken Qırımda yasaqlanğan “Hizb ut-Tahrir” teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etildi.
“Hizb ut-Tahrir” halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi “Hizb ut-Tahrir” teşkilâtını “terrorist” birleşme cedveline kirsetip, onı yasaq etti.
“Hizb ut-Tahrir işi” boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
