Eski Qırımda qırımtatar faaliniñ anası Zarema Kulametovanı belgisiz tarafqa alıp ketkenler. Bu aqta Qırım.Aqiqatqa onıñ qızı Riana Kulametova ikâye etip berdi.
Qızınıñ sözlerine köre, anası Eski Qırım parkında ceza olaraq belgilengen 250 saatlıq mecburiy işlerni yapa eken.
“Bir şaat aytqanına köre, beyaz mikroavtobus ve kül tüste bir maşna kelgen, parkta anamnı yanına telükesizlik hadimleri kelip vesiqalarını köstergen ve özüni alıp ketkenler. Onen bağlanıp olamayım. Şimdi men daa evel Eski Qırımda yaşağan evimiz yanına keldim, soqaq qapalı, meni evge kirsetmeyler”, – dep ikâye etti Kulametovanıñ qızı.
Riananıñ sözlerine köre, Zarema daa evel oğlu Giraynen yaşağan evi kirağa berile eken.
Malümat derc etilgen maaldegece rusiyeli telükesizlik hızmetleri olıp keçkenler boyunca bir izaat bermedi.
MEVZUĞA DAİR:Podpolkovnikni depressiyağa soqqanı içün cöreme: Qırım sakini politsiya hadimini aqaretlev içün mahküm etildi
2018 senesi fevral ayında Zarema Kulametova оlarnıñ hadimini “aqretlegeni içün”politsiya bölügine çağırılğan edi.
Qabaatlağan tarafnıñ versiyasına köre, Kulametova, onıñ oğlu Giray Kulametov tutulıp alınayatqan künü politsiya hadimini aqaretlegeni içün,sağlığına zarar bergen veayatiy telükege soqqan eken. Tahqiqat versiyasına köre, qabaatlanğan qadınnıñ aqaretlevinden Rusiyeniñ İslâm-Terek (Kirovskoye) rayonı İİN bölügi politsiya yolbaşçısınıñ muavini Andrey Rogojin zarar körgen eken.
2018 senesi aprel ayında İslâm-Terek (Kirovskoye) rayon mahkemesi Kulametova, politsiya hadimini aqaretlevde (Rusiye Cinayet kodeksiniñ 319-ncı maddesi) qabaatlı dep tanıdı. Qadın 250 saat mecburiy cemiyet işlerinde çalışuv ve zarar körgen politsiya hadimine tazminat olaraq 20 biñ ruble (8,3 biñ hrivna) ödevge mahküm etildi.
Zarema Kulametova özüni qabaatlı dep tanımay, onıñ imayecisi mahkeme qararına şikâyet berse de, bir netice alamadı.
Rusiye Qırımnı ilhaq etken soñ, mustaqil jurnalistler, cemaat ve qırımtatar Milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan “Hizb ut-Tahrir” ile alâqaları olğanında şeklengen musulmanlarnıñ evlerinde sıq-sıq tintüvler keçirip başladı.
