Sentâbrniñ 3-nde Herson vilâyetiniñ Rıkovo qasabasında işbu meskün yerdeqırımtatarca oquycaq ilk sınıf açıldı.
Qırım.Aqiqat muhbiri haber etkenine köre, sınıf açmaq teşebbüsi ana-babalardan çıqqan. Bundan ğayrı, buña Qırımtatar Milliy Meclisi, Bütündünya qırımtatar kongressi ve Türkiyedeki qırımtatar diasporası yardım etken.
Haberge köre, birinci sınıfqa barğan 53 baladan, 11-ri qırımtatar sınıfında oquycaq eken.
Sınıfnıñ açılışına bağışlanğan merasim toplaşuv zalında keçti. Mektepniñ qız talebeleri bayramğa fes kiyip keldi, oğlanlar ise, boyunlarına tamğalı köbelek taqıp keldiler.
Bayram tedbirinden soñ Herson vilâyetindeki Meclis temsilciliginiñ yolbaşçısı Abmecit Suleymanov ve Geniçesk rayon devlet memuriyeti yolbaşçısınıñ muavini Gulnara Bekirova qırımtatar sınıfında keçken ilk qırımtatarca dersni ziyaret etti.
2017 senesi Ukrainanıñ qıta qısmında ilk qırımtatar sınıfı Herson vilâyetiniñ Novoalekseyevka qasabasında açıldı.
Yerli meclislerniñ malümatına köre, Herson vilâyetinde Qırımnıñ tamır halqı olğan qırımtatarlarnıñ 10 biñden ziyadesi hususan toplu olaraq Geniçesk rayonında yaşamaqta.
