Avgustnıñ 29-nda saba rusiyeli telükesizlik hadimleri evinde tintüv yapqan soñ, Ukrain medeniyet merkeziniñ (UMM) faali Olga Pavlenko ilhaq etilgen Qırımdan Ukrainanıñ qıta qısmına keldi.
Bu aqta Gromadske radio haber ete.
“Ukrain medeniyet merkeziniñ (UMM) faali Olga Pavlenko ilhaq etilgen Qırımdan Ukrainanıñ qıta qısmına keldi”, – denilmekte haberde.
Mevzuğa dair: Telükeli «bağlar»: Qırımda «Pravıy sektor» sebebinden ukrain faaliniñ evinde tintüv yapıldı
Avgustnıñ 29-nda rusiyeli telükesizlik hadimleri Rusiyede yasaqlanğan “Pravıy sektor”nen onıñ ve aile azalarınıñ alâqası olğanında şeklengen Ukrain medeniyet merkeziniñ (UMM) faali Olga Pavlenkonıñ evinde tintüv ötkerdi. Aynı künü aqşam Pavlenko Aqmescitteki Rusiye Tahqiqat Komitetinde sorğulandı. O, sorğulav incelikleri aqqında aytmağa red etkenini bildire.
Faalniñ tanışları onıñ evindeki tintüvni Ukrain medeniyet merkeziniñ işinen bağlı malümatnıñ ”Russkaya vesna” saytına berilgeninen bağlaylar.
Amerika Qoşma Ştatlarınıñ Ukrainadaki elçihanesi avgustnıñ 30-nda rusiyeli telükesizlik hadimleri Aqmescitteki Ukrain medeniyet merkeziniñ (UMM) faali Olga Pavlenkonıñ evinde tintüv ötkergeninden raatsız olğanını bildirdi.
Bu yıl aprel ayında Qırımdaki Ukrain medeniyet merkeziniñ faalleri Olena Popova ve Olga Pavlenkonı Aqmescitniñ rusiyeli prokurorınıñ üyken yardımcısı Aleksey Puçkov “subet” keçirmege çağırğan edi. Prokuratura hadimi Merkezniñ işi ve “Krımskiy teren” gazetasınıñ neşirinen meraqlanğan. Faaller özü ve yaqınlarına qarşı şaatlıq bermeme aqqından faydalanğan.
Qırımdaki Ukrain medeniyet merkezi siyasiy bir teşkilât degil. Onı faaller yarımadada ukrain medeniyetini saqlamaq ve populârlaştırmaq maqsadınen teşkil etken ediler. Bu arada Merkez iştirakçilerine tazyıq yapılmaqta: olar telükesizlik organları tarafından sorğulav ve “subetlerge” çağırıla, ekstremizmge yol berememezlik hususında tenbiylene. Qırımdaki Ukrain medeniyet merkeziniñ faallerinden biri olğan Leonid Kuzmin telükesizlik hadimleri tarafından yapılğan basqı ve qorquzuvlardan soñ 2017 senesi yarımadanı terk etmege mecbur qalğan edi.
