Qırımda rusiyeli memuriyet Qırımtatar akademik muzıkalı-dramatik teatriniñ dağıtımasınen bağlı areketlerni devam ettire denilmekte Qırımtatar Milliy Meclisiniñ reisi Refat Çubarovnıñ beyanatında.
Çubarovnıñ sözlerine köre, “bütünley uydurılğan ve üfürtilgen sebeplenden dolayı” 2018 senesi avgust ayınıñ başında teatrniñ bediy reberi Bilâl Bilâlovnıñ qanunsız boşatıluvı, “işğalci memuriyet tarafından qırımtatar teatrini ğayıp etüv areketleriniñ başlanğıçıdır”.
Çubarov, teatr taqımı öz reberini qorçalap başladı, “lâkin teatr bediy taqımınıñ professional delil ve tenbiyelevleri rusiyeli işğalcige asla tesir etmedi», dep qayd ete.
Milliy Meclis yolbaşçısınıñ sözlerine köre, daa evel hocalıq meseleleri boyunca teatr mudiriniñ muavini vazifersinde çalışqan Mecide Melgaziyevanıñ mudir vazifesine, bediy reber vazifesine ise – aktör Eldar Celilovnıñ tayin etilgeni, taqım hadimleriniñ işten boşamasına sebep oldı. Narazılıq kösterip işten boşağan teatrniñ on altı hadimi arasında – beşi Ukrainada, üçü Qırım Muhtar Cumhuriyetinde nam qazanğan artistlerdir.
“Qırımtatar artistleriniñ öz halqınıñ medeniyetine sadıq olması ve cesareti, öz zenaatınıñ ğayelerine sadıq qalğanlarına qırımtatar cemaatlığı, halqara professional teatr hadimleri qolttuttı ve alğışladı. Qırımtatar Milliy Meclisi adından dünyada yekâne olğan qırımtatar professonal teatrini qorçalağan Qırımtatar akademik muzıkalı-dramatik teatri taqımına qol tutqanımnı bildirmek isteyim”, – denilmekte beyanatta.
Çubarov “Ukraina devlet organları ile halqara partnörlernıñ ortaq areketleri birleştirilüvi neticesinde qırımtatar artistleriniñ professional faaliyetiniñ tiklenmesi içün uyğun şartlar teşkil eteleceğine” ümüt ete.
Haber etilgeni kibi, Qırımtatar muzıkalı-dramatik teatriniñ hadimleri onıñ bediy reberi Bilâl Bilâlovnıñ işten boşatılğanı aqqında qarar alınğan soñ işten boşaycağına dair ariza yazğan edi.
Avgustnıñ 7-nde Qırımtatar muzıkalı-dramatik teatriniñ bediy reberi, Ukraina nam qazanğan sanat erbabı Bilâl Bilâlov işten boşatıldı. Rejissör uydurıq bir sebeplerden dolayı işten boşatıldı dep saya.
Rejissör işten boşatılğanı içün mahkemege muracaat etecegini haber etken edi. Teatr taqımı yolbaşçısına bütünley qol tuttı. Oña qol tutqanı aqqında Qırımtatar Milliy Meclisiniñ reisi Refat Çubarov da aytqan edi.
Bilâlov Qırımtatar muzıkalı-dramatik teatrinde 1989 senesi çalışıp başlay, 1994 senesinden itibaren onıñ bediy reberi-mudiri ola.
