Qırımtatar muzıkalı-dramatik teatri taqımınıñ bazı hadimleri onıñ bediy reberi Bilâl Bilâlovnıñ işten boşatılğanı aqqında qarar alınğan soñ, işten boşaycağına dair ariza yazdı. Bu aqta avgustnıñ 30-nda Crimean tatars saytı haber ete.
“Tünevin teatr hadimlerini yañı yolbaşçısınen tanıştırdılar. Narazılıq maqsadınen 15-ten ziyade hadim işten boşaycaq oldı. Olar arasında baş rejissör Rinat Bektaş ve arasında 30 yıldan ziyade çalışqan eñ parlaq aktör ve solistler bar”, – denilmekte haberde.
“Bu ömürde bir kere emin yetilir. Men bizim qırımtatar teatrimizde 30 yıldan ziyade çalışam ve bunen ğururlanam. Bugün bizge kösterilgen namzetlernen razı degilmiz. Men öz istegimnen boşaycağım aqqında ariza yazdım”, – dep ayttı teatr aktörı Dilâver Settarov.
Haber etilgenine köre, Bilâl Bilâlov vazifesine keri qaytarılğan taqdirde, işten boşağan aktörlar işke qaytacağına ümüt ete.
Avgustnıñ 7-nde Qırımtatar muzıkalı-dramatik teatriniñ bediy reberi, Ukraina nam qazanğan sanat erbabı Bilâl Bilâlov işten boşatıldı. Rejissör uydurıq bir sebeplerden dolayı işten boşatıldı dep saya.
Rejissör daa evel işten boşatılğanı içün mahkemege muracaat etecegini haber etken edi. Teatr taqımı yolbaşçısına bütünley qol tuttı. Oña qol tutqanı aqqında Qırımtatar Milliy Meclisiniñ reisi Refat Çubarov da aytqan edi.
Bilâlov Qırımtatar muzıkalı-dramatik teatrinde 1989 senesi çalışıp başlay, 1994 senesinden itibaren onıñ bediy reberi-mudiri ola.
